फलंदाजी, गोलंदाजी आणि क्षेत्ररक्षणात तिहेरी यश; भारतीय संघाचा कर्णधार रोहित शर्माकडून लाभले मराठीत मार्गदर्शन
रत्नागिरी : Ratnagiri Aviraj Gawade Cricket विश्वातून रत्नागिरीसाठी एक अत्यंत अभिमानास्पद आणि प्रेरणादायी बातमी समोर आली आहे. इंग्लंडमधील प्रतिष्ठित अशा मिडलसेक्स काऊंटी क्रिकेट लीगमध्ये आपल्या अष्टपैलू कामगिरीच्या जोरावर रत्नागिरीचा तरुण क्रिकेटपटू अविराज अनिल गावडे याने तुफान गाजवले आहे. २०२५ आणि २०२६ या सलग दोन हंगामांमध्ये त्याने फलंदाजीत धडाकेबाज १,४१७ धावा फटकावल्या आहेत, तर आपल्या प्रभावी लेगस्पिन गोलंदाजीच्या जिकारावर तब्बल ११७ बळी टिपत आंतरराष्ट्रीय स्तरावर आपली तीव्र छाप उमटवली आहे. याशिवाय २७ झेल आणि ६ धावबाद अशा उत्कृष्ट कामगिरीसह त्याने फलंदाजी, गोलंदाजी आणि क्षेत्ररक्षण या क्रिकेटच्या तिन्ही आघाड्यांवर आपली अफाट गुणवत्ता सिद्ध करून दाखवली आहे.
इंग्लंडमधील आव्हानात्मक आणि वेगवान क्रिकेट वातावरणात सातत्यपूर्ण कामगिरी करणे कोणत्याही खेळाडूसाठी अत्यंत कठीण असते. मात्र, अशा प्रतिकूल परिस्थितीतही अविराजने सलग दोन हंगामांत केलेली कामगिरी अतिशय लक्षवेधी ठरली आहे. विशेषतः आपल्या अचूक लेगस्पिन गोलंदाजीच्या जोरावर प्रतिस्पर्धी संघाच्या फलंदाजांना गुडघे टेकण्यास भाग पाडत त्याने संघाच्या विजयात आणि यशात मोलाचे योगदान दिले आहे.
२०२५ मधील पदार्पणातच सात बळींचा पराक्रम
अविराजने २०२५ मधील आपल्या पदार्पणाच्या हंगामातच मिडलसेक्स काऊंटी क्रिकेट लीगमध्ये अष्टपैलू क्षमतेची जोरदार चुणूक दाखवली. या पहिल्याच हंगामात २० सामन्यांमधील १९ डावांमध्ये फलंदाजी करताना त्याने ९८ च्या स्ट्राईक रेटने ५३६ धावा केल्या. यामध्ये त्याच्या एका शानदार नाबाद ११० धावांच्या शतकीय खेळीचाही समावेश होता. गोलंदाजीतही त्याने तितकीच भीषण चमक दाखवली. संपूर्ण हंगामात प्रभावी मारा करत त्याने ४८ बळी आपल्या नावावर केले. विशेष म्हणजे, एका सामन्यात अवघ्या २७ धावा देऊन तब्बल ७ फलंदाजांना बाद करणारा भीमपराक्रम त्याने केला, ज्याने प्रतिस्पर्धी संघाच्या फलंदाजीचे कंबरडे मोडले.
२०२६ च्या हंगामात ८८१ धावांसह ६९ बळींची शिकार
पहिल्या वर्षीच्या घवघवीत यशामुळे आत्मविश्वास उंचावलेल्या अविराजने २०२६ च्या हंगामात आपल्या कामगिरीचा आलेख आणखी कैक पटीने उंचावला. यंदाच्या २२ सामन्यांमध्ये खेळताना त्याने १०८ च्या दणदणीत स्ट्राईक रेटने तब्बल ८८१ धावा फटकावल्या. यात नाबाद ११६ धावांची आणखी एक लाजवाब शतकी खेळी गाजवली. गोलंदाजीच्या मोर्च्यावर त्याने २२ सामन्यांत ६९ बळी मिळवण्याची कामगिरी केली. यादरम्यान, एका सामन्यात अवघ्या ३० धावा खर्च करून ६ फलंदाजांना पॅव्हेलियनचा रस्ता दाखवणे ही त्याची या हंगामातील सर्वोत्कृष्ट गोलंदाजी ठरली. दोन्ही हंगामांची एकत्रित आकडेवारी पाहता त्याच्या नावावर १,४१७ धावा आणि ११७ बळी जमा झाले आहेत.
क्षेत्ररक्षणातही उमटवला अष्टपैलू ठसा
फक्त धावांशी किंवा बळींशी आपले नाते न ठेवता अविराजने क्षेत्ररक्षणातही आपल्या चपळाईची कमाल दाखवली आहे. या दोन हंगामांच्या कालावधीत त्याने क्षेत्ररक्षणात तब्बल २७ झेल टिपले, तर ६ खेळाडूंना अचूक थ्रो करत धावबाद करण्यात महत्त्वाची भूमिका बजावली. त्यामुळे त्याची ही कामगिरी केवळ आकडेवारीपुरती मर्यादित न राहता एका परिपूर्ण अष्टपैलू खेळाडूची ओळख निर्माण करणारी ठरली आहे.
रोहित शर्माचे मराठी मार्गदर्शन आणि दिग्गजांचा सहवास
इंग्लंडमधील या खडतर आणि प्रेरणादायी क्रिकेट प्रवासात अविराजला भारताचा स्टार क्रिकेटपटू तथा कर्णधार रोहित शर्मा याच्याशी प्रत्यक्ष संवाद साधण्याची सुवर्णसंधी लाभली. विशेष म्हणजे, रोहित शर्माने त्याच्याशी संवाद साधताना अस्खलित मराठी भाषेतून केलेले मार्गदर्शन अविराजसाठी अत्यंत अमूल्य, विस्मरण न होणारे आणि आयुष्य बदलून टाकणारे ठरले.
याशिवाय, वेस्ट इंडिजचा धडाकेबाज खेळाडू शमार स्प्रिंगर, श्रीलंकेचा माजी आंतरराष्ट्रीय क्रिकेटपटू अँजेलो मॅथ्यूज, ऑस्ट्रेलिया ‘अ’ संघाचा ख्रिश्चन जॅडलीन तसेच पाकिस्तानचे माजी आंतरराष्ट्रीय खेळाडू झाहिद अली आणि मोहम्मद वाहिद यांच्यासह खांद्याला खांदा लावून सराव करण्याची व मैदानात खेळण्याची संधी त्याला मिळाली. जगातील या दिग्गज खेळाडूंच्या सहवासातून आणि मार्गदर्शनातून आंतरराष्ट्रीय क्रिकेटमधील तांत्रिक बारकावे आणि उच्च दर्जाच्या खेळाचा गाढा अनुभव आत्मसात करणे अविराजला शक्य झाले आहे.
