बँक ऑफ इंडियाच्या शाखेतील जॉइण्ट सेव्हिंग खात्याला सायबर भामट्याचा गंडा; दापोली पोलिसांत गुन्हा दाखल
रत्नागिरी जिल्ह्यातील दापोली तालुक्यातील केळशी येथील बँक ऑफ इंडियाच्या शाखेत असलेल्या एका सामायिक (जॉइण्ट सेव्हिंग) खात्यातून अज्ञात सायबर भामट्याने तब्बल ३ लाख ९९ हजार २२९ रुपये परस्पर लाटल्याची धक्कादायक घटना समोर आली आहे. या प्रकरणी फिर्यादी शैलेश गणपत सावंत (वय ४६, सध्या रा. शिवडी, मुंबई, मूळ रा. केळशी कांदेवाडी, ता. दापोली) यांनी दिलेल्या तक्रारीवरून दापोली पोलीस ठाण्यात अज्ञात व्यक्तीविरोधात Bank Fraud (बँक फसवणूक) आणि सायबर गुन्ह्यांतर्गत गुन्हा दाखल करण्यात आला आहे.
वेगवेगळ्या ट्रॅन्झॅक्शन आयडीचा वापर करून घडवला अपहार
पोलिसांनी दिलेल्या माहितीनुसार, फिर्यादी शैलेश सावंत यांचे बँक ऑफ इंडियाच्या केळशी शाखेत जॉइण्ट सेव्हिंग खाते आहे. दिनांक १२ ऑक्टोबर २०२६ ते २२ ऑक्टोबर २०२६ या १० दिवसांच्या कालावधीत कोणत्याही अधिकृत परवानगीशिवाय किंवा माहितीशिवाय एका अज्ञात व्यक्तीने वेगवेगळ्या ट्रॅन्झॅक्शन आयडीचा गैरवापर केला. या भामट्याने खात्यातील एकूण ३ लाख ९९ हजार २२९ रुपये ७१ पैसे परस्पर अन्यत्र ट्रान्सफर करून सावंत यांना आर्थिक गंडा घातला.
आपली आर्थिक फसवणूक झाल्याचे लक्षात आल्यानंतर फिर्यादींनी तात्काळ दापोली पोलीस ठाण्यात धाव घेत तक्रार नोंदवली. त्यानुसार पोलिसांनी २९ ऑक्टोबर २०२६ रोजी सायंकाळी पावणेपाचच्या सुमारास संबंधित अज्ञात आरोपीविरोधात फसवणुकीचा गुन्हा नोंदवून तपास सुरू केला आहे. वाढत्या सायबर गुन्ह्यांमुळे बँक खातेधारकांमध्ये चिंतेचे वातावरण निर्माण झाले असून, नागरिकांनी बँक व्यवहारांमध्ये अधिक सुरक्षितता बाळगावी, असे आवाहन प्रशासनाकडून केले जात आहे.
