आंध्र प्रदेशसह महाराष्ट्राला सतर्कतेचा इशारा; ताशी १२० किमी वेगाने वारे आणि मुसळधार पावसाची शक्यता
नवी दिल्ली / मुंबई:
Cyclone Murasu Bay Of Bengal च्या प्रभावामुळे देशातील किनारपट्टीच्या भागात पुन्हा एकदा निसर्गाचे मोठे संकट उभे ठाकले आहे. ‘अर्नव्ह’ (Arnav) या विनाशकारी चक्रीवादळाने घडवून आणलेल्या प्रचंड नुकसानीनंतर आता बंगालच्या उपसागरात ‘मुरासू’ (Murasu) नावाचे आणखी एक नवे चक्रीवादळ वेगाने सक्रिय झाले आहे. या चक्रीवादळाच्या तीव्रतेची गंभीर दखल घेत भारतीय हवामान विभागाने (IMD) बाधित राज्ये आणि किनारपट्टीच्या भागांमध्ये उच्च सतर्कतेचा (High Alert) इशारा जारी केला आहे.
हवामान विभागाने दिलेल्या माहितीनुसार, ‘मुरासू’ चक्रीवादळ सोमवारी सकाळी पश्चिम-उत्तर-पश्चिम दिशेने वेगाने पुढे सरकले असून ते सध्या आंध्र प्रदेशच्या दक्षिण किनारपट्टीपासून अवघ्या १६० किलोमीटर अंतरावर केंद्रित आहे. सध्या हे वादळ १४.१ डिग्री उत्तर अक्षांशाच्या जवळपास असून, सोमवारी रात्री ११ ते मंगळवारी पहाटे ४ वाजेच्या सुमारास ते नेल्लोर ते नरसापूर दरम्यान थेट किनारपट्टीवर धडकण्याची (Landfall) दाट शक्यता आहे. किनारपट्टीवर धडकताना वाऱ्याचा वेग ताशी १०० ते ११० किमी राहील, तर वादळाचा जोर वाढल्यास वाऱ्याचा कमाल वेग ताशी १२० किलोमीटरपर्यंत पोहोचू शकतो, असा इशारा देण्यात आला आहे. या काळात तुफान वाऱ्यासह अतिमुसळधार पावसाचा अंदाज वर्तवण्यात आला असून आंध्र प्रदेशसह बिहार, झारखंड आणि उत्तर प्रदेश या राज्यांना अलर्टवर ठेवण्यात आले आहे.
महाराष्ट्रात पुढील २४ तासांत पावसाचा जोर वाढणार
‘मुरासू’ चक्रीवादळाचा थेट आणि मोठा प्रभाव महाराष्ट्रातील हवामानावरही पाहायला मिळणार आहे. हवामान खात्याने वर्तवलेल्या ताज्या अंदाजानुसार, पुढील २४ तासांमध्ये राज्यात वादळी वाऱ्यासह मुसळधार पावसाची शक्यता आहे.
विशेषतः गडचिरोली, यवतमाळ, नांदेड, लातूर, कोल्हापूर आणि सिंधुदुर्ग या जिल्ह्यांमध्ये पुढील २४ तासांत विजांच्या कडकडाटासह मुसळधार ते अतिमुसळधार पावसाचा कडक इशारा देण्यात आला आहे. येत्या पुढील तीन दिवसांपर्यंत राज्यामध्ये पावसाचा हा जोर कायम राहणार असून, शेतकरी व किनारपट्टीवरील नागरिकांना विशेष खबरदारी आणि सतर्कता बाळगण्याचे आवाहन प्रशासनाकडून करण्यात आले आहे.
