नेमबाजी प्रशिक्षक नेहा चव्हाण यांना द्रोणाचार्य, तर पुण्याच्या आर्मी पॅरालिम्पिक नोडचा राष्ट्रीय खेल प्रोत्साहन पुरस्काराने गौरव; सलग दुसऱ्या वर्षी क्रिकेटपटू यादीबाहेर
नवी दिल्ली / मुंबई: Arjuna Awards 2025 अंतर्गत विविध क्रीडा प्रकारांमध्ये उल्लेखनीय कामगिरी करणाऱ्या देशातील १७ खेळाडूंना राष्ट्रपती भवनात आयोजित भव्य समारंभात राष्ट्रपती द्रौपदी मुर्मू यांच्या हस्ते प्रतिष्ठेचे राष्ट्रीय क्रीडा पुरस्कार प्रदान करण्यात आले. या सोहळ्यात नागपूरची विश्वविजेती बुद्धिबळपटू दिव्या देशमुख आणि नाशिकचा ग्रँडमास्टर विदित गुजराती यांना अर्जुन पुरस्काराने सन्मानित करण्यात आले, तर महाराष्ट्राच्या नेमबाजी प्रशिक्षक नेहा चव्हाण यांना द्रोणाचार्य पुरस्कार आणि पुण्यातील आर्मी पॅरालिम्पिक नोड या संस्थेला राष्ट्रीय खेल प्रोत्साहन पुरस्कार देऊन गौरवण्यात आले.
यंदाच्या राष्ट्रीय क्रीडा पुरस्कारांमध्ये महाराष्ट्रातील खेळाडू, प्रशिक्षक आणि क्रीडा संस्थांनी आपला विशेष ठसा उमटवला आहे. ॲथलेटिक्स, बुद्धिबळ, बॉक्सिंग, बॅडमिंटन, हॉकी, कबड्डी, नेमबाजी, रोइंग आणि पॅरा स्पोर्ट्समधील खेळाडूंचा या सन्मानाने गौरव झाला. यामध्ये डेकॅथलॉनपटू तेजस्विन शंकर आणि रेस वॉकर प्रियंका गोस्वामी यांचाही समावेश आहे. विशेष बाब म्हणजे, यंदाच्या अर्जुन पुरस्कार विजेत्यांच्या यादीत एकाही क्रिकेटपटूला स्थान मिळालेले नाही. यापूर्वी २०२३ मध्ये वेगवान गोलंदाज मोहम्मद शमी याला अर्जुन पुरस्काराने सन्मानित करण्यात आले होते; त्यानंतर कोणत्याही क्रिकेटपटूची या पुरस्कारासाठी निवड झालेली नाही.
जीवनगौरव आणि द्रोणाचार्य पुरस्कारांचे वितरण
खेळाडूंसोबतच क्रीडा क्षेत्रातील प्रदीर्घ योगदानाबद्दल आणि प्रशिक्षकांच्या कार्याबद्दलही या सोहळ्यात विशेष सन्मान प्रदान करण्यात आले. १९६२ च्या आशियाई क्रीडा स्पर्धेत सुवर्णपदक जिंकणाऱ्या भारतीय फुटबॉल संघाचे सदस्य आय. अरुमैनायगम यांना ‘अर्जुन पुरस्कार (जीवनगौरव)’ देऊन गौरवण्यात आले. तसेच, प्रशिक्षकांच्या योगदानाचा सन्मान करणाऱ्या ‘द्रोणाचार्य पुरस्कारा’ने नेहा चव्हाण यांच्यासह परवीर सिंग आणि छोटे लाल यादव यांना सन्मानित करण्यात आले. ‘द्रोणाचार्य पुरस्कार (जीवनगौरव)’ हा सन्मान धर्मेंद्र यादव आणि वीरेंद्र कुमार यांना प्रदान करण्यात आला.
मुख्यमंत्री देवेंद्र फडणवीस यांच्याकडून अभिनंदन
राष्ट्रीय क्रीडा पुरस्कार विजेत्यांचे मुख्यमंत्री देवेंद्र फडणवीस यांनी सोशल मीडियाच्या माध्यमातून अभिनंदन केले आहे. महाराष्ट्रातील खेळाडू आणि संस्थांच्या यशाचे विशेष कौतुक करताना त्यांनी दिव्या देशमुख, विदित गुजराती, नेमबाजी प्रशिक्षक नेहा चव्हाण आणि पुण्यातील आर्मी पॅरालिम्पिक नोड यांचा आवर्जून उल्लेख केला. राज्यातील खेळाडूंची ही उल्लेखनीय कामगिरी, त्यांचे समर्पण आणि उत्कृष्टतेप्रती असलेली बांधिलकी महाराष्ट्राची मान उंचावणारी असल्याचे मुख्यमंत्र्यांनी म्हटले आहे. या यशामुळे देशभरातील नवोदित खेळाडूंना मोठी प्रेरणा मिळेल, असा विश्वासही त्यांनी व्यक्त केला.
अर्जुन पुरस्कार २०२५ विजेत्यांची संपूर्ण यादी:
बुद्धिबळ: विदित गुजराती, दिव्या देशमुख
ॲथलेटिक्स: तेजस्विन शंकर, प्रियंका गोस्वामी (रेस वॉक), मुहम्मद अजमल व्ही.
बॅडमिंटन: त्रिशा जॉली, गायत्री गोपीचंद
हॉकी: राजकुमार पाल, लालरेमसियामी
कबड्डी: सुरजीत, पूजा
नेमबाजी: अखिल श्योराण, धनुष श्रीकांत (कर्णबधिर नेमबाजी)
बॉक्सिंग: नरेंद्र बरवाल
रोइंग: अरविंद सिंग
पॅरा स्पोर्ट्स: रुद्रांश खंडेलवाल (पॅरा नेमबाजी), एकता भयान (पॅरा ॲथलेटिक्स)
इतर प्रमुख पुरस्कार विजेते:
अर्जुन पुरस्कार (जीवनगौरव): आय. अरुमैनायगम (फुटबॉल)
द्रोणाचार्य पुरस्कार २०२५: परवीर सिंग, छोटे लाल यादव, नेहा चव्हाण
द्रोणाचार्य पुरस्कार (जीवनगौरव): धर्मेंद्र यादव, वीरेंद्र कुमार
