निष्काळजीपणे वाहन चालवून अपघातास कारणीभूत ठरल्याप्रकरणी मयत चालकाविरुद्ध गुन्हा दाखल
खेड: Khed Bike Accident या दुर्दैवी घटनेत खेड तालुक्यातील भेलसई ते खेर्डी प्रवासादरम्यान भरधाव आणि निष्काळजीपणे चालवलेली दुचाकी मोरीवरील पुलाच्या सिमेंट कठड्यावर जोरदार आदळल्याने २६ वर्षीय तरुणाचा मृत्यू झाला, तर त्याच्यासोबत मागे बसलेला २१ वर्षीय तरुण जखमी झाला आहे. ही अपघाताची घटना ११ नोव्हेंबर २०२६ रोजी सकाळी ८.४५ वाजण्याच्या सुमारास भेलसई, खांबेवाडी येथील वळणावर घडली. याप्रकरणी जखमी झालेले सहप्रवासी हर्षद संजय तांबे (वय २१, व्यवसाय नोकरी, रा. भेलसई, ता. खेड) यांनी दिलेल्या फिर्यादीवरून खेड पोलीस ठाण्यात मयत दुचाकीचालकाविरुद्ध गुन्हा दाखल करण्यात आला आहे.
मिळालेल्या माहितीनुसार, फिर्यादी हर्षद तांबे आणि मयत आरोपी चालक रविंद्र भागुराम तांबे (वय २६, रा. भेलसई बौद्धवाडी, ता. खेड) हे दोघेजण होंडा शाईन दुचाकीवरून (क्र. एम.एच. ०८ ए.डब्ल्यु ६५६१) भेलसई ते खेर्डी असा प्रवास करत होते. त्यांची दुचाकी भेलसई खांबेवाडी येथील वळणावर आली असता, चालक रविंद्र याने रस्त्याच्या परिस्थितीकडे दुर्लक्ष करत निष्काळजीपणे वाहन चालवले. परिणामी त्याचा दुचाकीवरील ताबा सुटला आणि अनियंत्रित झालेली ही दुचाकी रस्त्याच्या साईडपट्टीवरून जाऊन थेट मोरीवरील पुलाच्या सिमेंट कठड्यावर जोरदार आपटली.
मयत चालकाविरुद्ध खेड पोलीस ठाण्यात गुन्हा दाखल
या भीषण धडकेत चालक रविंद्र तांबे याच्या डोक्याला अत्यंत गंभीर दुखापत झाल्याने त्याचा मृत्यू झाला, तर फिर्यादी हर्षद तांबे याच्या डाव्या हाताच्या मनगटावर व डोक्याला दुखापत झाली असून दुचाकीचेही मोठे नुकसान झाले आहे.
या घटनेबाबत १२ नोव्हेंबर २०२६ रोजी सायंकाळी ४.२८ वाजता पोलिसांत अधिकृत नोंद करण्यात आली. या अपघातास आणि स्वतःच्या मृत्यूस कारणीभूत ठरल्याप्रकरणी खेड पोलिसांनी मयत चालक रविंद्र भागुराम तांबे याच्याविरुद्ध गुन्हा रजिस्टर क्रमांक ३५४/२०२६ नुसार भारतीय न्यायसंहिता अधिनियम २०२३ चे कलम १०६ (१), २८१, १२५ (अ), १२५ (ब) तसेच मोटार वाहन कायदा कलम १८४ आणि ३ (१)/१८१ प्रमाणे गुन्हा दाखल केला असून, पोलीस या प्रकरणाचा पुढील तपास करत आहेत.
