सलग आठव्या दिवशी नरमाई; रुपयाची मजबुती आणि अमेरिकन फेड रिझर्व्हच्या भूमिकेचा सराफा बाजारावर दबाव
Gold Silver Price मधील घसरणीचे सत्र कायम असून, गुरुवारी देशांतर्गत सराफा बाजारात सोने आणि चांदीच्या किमतीत मोठी घट नोंदवण्यात आली आहे. दिल्लीच्या सराफा बाजारात २४ कॅरेट सोन्याचा दर १,३०० रुपयांनी स्वस्त होऊन १,३४,५०० रुपये प्रति तोळा या पातळीवर आला, तर चांदीचा दर २,५०० रुपयांनी घसरून १,६२,००० रुपये प्रति किलोवर स्थिरावला आहे.
सोन्याच्या दरात सलग आठव्या दिवशी ही घसरण पाहायला मिळाली आहे. यापूर्वी ९ नोव्हेंबर रोजी एक तोळा सोन्याचा दर १,४६,९०० रुपयांवर पोहोचला होता. त्या तुलनेत आतापर्यंत सोन्याच्या किमतीत तब्बल १२,४०० रुपयांची घट झाली आहे.
Gold Silver Price मधील घसरणीमागे आंतरराष्ट्रीय आणि देशांतर्गत घटक
जागतिक बाजारपेठेतही मौल्यवान धातूंवर दबाव कायम आहे. आंतरराष्ट्रीय बाजारात स्पॉट गोल्डचा दर ३,७१७.५७ डॉलर प्रति औंस, तर चांदीचा दर ४४.९२ डॉलर प्रति औंसवर नोंदवला गेला आहे. रुपया मजबूत झाल्यामुळे देशांतर्गत बाजारात सोने आणि चांदीच्या दरावर दबाव निर्माण झाला आहे. तसेच, अमेरिकन फेड रिझर्व्हच्या पतधोरणाबाबतच्या कठोर भूमिकेमुळे गुंतवणूकदार सोन्यापासून दूर जात असल्याचे चित्र दिसत आहे.

एलकेपी सिक्युरिटीजचे उपाध्यक्ष आणि रिसर्च विश्लेषक जतिन त्रिवेदी यांच्या मते, सोन्यासाठी पुढील सपोर्ट पातळी १,२५,००० रुपये असेल, तर १,३५,००० रुपयांची पातळी तात्काळ रेझिस्टन्सचे काम करेल. सोने दराची पुढील दिशा अमेरिकन फेड रिझर्व्हच्या डिसेंबरमध्ये होणाऱ्या आगामी बैठकीतील निर्णयांवर निश्चित होऊ शकते, असेही त्यांनी नमूद केले आहे.
आयबीजेए (IBJA) नुसार १९ नोव्हेंबरचे दर
इंडिया बुलियन अँड ज्वेलर्स असोसिएशनच्या (IBJA) दरानुसार, १९ नोव्हेंबर रोजी २४ कॅरेट सोन्याचा एका तोळ्याचा दर १,२९,५३१ रुपये इतका नोंदवला गेला आहे. याशिवाय २२ कॅरेट सोन्याचा दर १,१८,६५० रुपये प्रति तोळा, तर एक किलो चांदीचा दर १,६०,४३९ रुपये इतका राहिला आहे.













