गावतळे हनुमानवाडी येथील भरदुपारचा प्रकार; पाठमोरे असताना अचानक केला हल्ला, २८ वर्षीय तरुणाविरुद्ध दापोली पोलीस ठाण्यात गुन्हा दाखल
दापोली (रत्नागिरी) :
दापोली तालुक्यातील गावतळे हनुमानवाडी येथे आपल्या सलूनमध्ये ग्राहकाची दाढी करणाऱ्या एका ३० वर्षीय तरुण व्यावसायिकावर त्यांच्याच वाडीतील एका तरुणाने दारूच्या नशेत लाकडी रीपने (पट्टीने) हल्ला केल्याची धक्कादायक घटना घडली आहे. या हल्ल्यात सलून व्यावसायिक जखमी झाला असून, आरोपीने त्यांना शिवीगाळ करत जीवे मारण्याची धमकीही दिली आहे. याप्रकरणी दापोली पोलीस ठाण्यात २८ वर्षीय आरोपीविरुद्ध गुन्हा दाखल करण्यात आला आहे.
पाठमोरे असल्याची संधी साधून लाकडी पट्टीने मारहाण :
पोलिसांकडून मिळालेल्या माहितीनुसार, फिर्यादी शुभम संतोष शिंदे (वय ३० वर्षे, व्यवसाय- सलून, रा. गावतळे हनुमानवाडी, ता. दापोली, जि. रत्नागिरी) यांचे गावतळे हनुमानवाडी येथे सलूनचे दुकान आहे. गुरुवार, दिनांक १९ नोव्हेंबर २०२६ रोजी दुपारी १.१५ वाजण्याच्या सुमारास शुभम शिंदे हे आपल्या दुकानात एका ग्राहकाची दाढी करत होते. कामात व्यस्त असल्याने ते पाठमोरे उभे होते. हीच संधी साधून त्यांच्याच वाडीतील आरोपी सौरभ भार्गराम म्हाब्दी (वय २८ वर्षे, रा. गावतळे हनुमानवाडी, ता. दापोली) हा दारू पिऊन त्या ठिकाणी आला आणि हातातील लाकडी रीपने (पट्टीने) शुभम शिंदे यांच्या पाठीवर व डाव्या हाताच्या पंजावर जोरदार मारहाण करून त्यांना जखमी केले. एवढेच नव्हे तर आरोपीने त्यांना अश्लील शिवीगाळ करत जीवे मारण्याची धमकी दिली.
दापोली पोलीस ठाण्यात आरोपीविरुद्ध गुन्हा नोंद :
या मारहाण आणि धमकीच्या प्रकारानंतर जखमी शुभम संतोष शिंदे यांनी गुरुवार, दिनांक १९ नोव्हेंबर २०२६ रोजी सायंकाळी ६.११ वाजता दापोली पोलीस ठाण्यात रीतसर तक्रार दाखल केली. त्यांच्या फिर्यादीवरून दापोली पोलिसांनी आरोपी सौरभ भार्गराम म्हाब्दी याच्याविरुद्ध गुन्हा रजिस्टर क्रमांक २५२/२०२६ नुसार भारतीय न्यायसंहिता अधिनियम २०२३ चे कलम ११८(१), ३५१(२) आणि ३५२ अन्वये गुन्हा दाखल केला असून पोलीस पुढील तपास करत आहेत.














