रत्नागिरी : रत्नागिरी शहरात सध्या मोठ्या प्रमाणावर बांधकाम आणि खोदकामाचे काम सुरू आहे. मात्र, या कामांचा परिणाम नागरिकांच्या दैनंदिन जीवनावर होत असल्याचे दिसत आहे. आज सकाळी पॉलिटेक्निक परिसरात रत्नागिरी नगर परिषदेच्या (रनप) खोदकामादरम्यान घरगुती सीएनजी पाइपलाइन फुटल्याची घटना घडली. सावधगिरीमुळे मोठी दुर्घटना टळली असली तरी, यामुळे शहरातील अनेक भागांतील सीएनजी पुरवठा खंडित झाला. परिणामी, अनेक नागरिक दुपारच्या जेवणापासून वंचित राहिले.
महानगर गॅस कंपनीने तातडीने दुरुस्तीचे प्रयत्न सुरू केले, मात्र दुपारपर्यंत गॅस पुरवठा पूर्ववत होऊ शकला नाही. सकाळी साडेअकराच्या सुमारास ही घटना घडली आणि दुपारी दीड वाजेपर्यंत तरी सीएनजी पुरवठा सुरळीत झाला नव्हता. शहरात काँक्रीट रस्ते आणि पाणीपुरवठा योजनेच्या कामानंतर आता सीएनजी पाइपलाइनचे खोदकाम सुरू आहे. मात्र, वारंवार होणाऱ्या खोदकामामुळे नागरिकांना अनेक अडचणींचा सामना करावा लागत आहे.
नागरिकांची धावपळ, हॉटेल आणि ऑनलाइन ऑर्डरवर भर
सीएनजीवर अवलंबून असलेल्या अनेक कुटुंबांनी एलपीजी सिलेंडरचा वापर बंद केला आहे. सीएनजी शेगडीला एलपीजी सिलेंडर लावता येत नसल्याने जेवण बनवण्यासाठी नागरिकांची चांगलीच धावपळ उडाली. यामुळे काहींनी हॉटेलचा आधार घेतला, तर काहींना ऑनलाइन जेवण मागवावे लागले. विशेषतः वयोवृद्ध आणि आजारी व्यक्ती असलेल्या कुटुंबांना याचा मोठा त्रास सहन करावा लागला. स्वयंपाकींचे वेळापत्रकही कोलमडले, ज्यामुळे अनेकांना अतिरिक्त खर्च करावा लागला.
नगर परिषदेच्या नियोजनावर प्रश्नचिन्ह
रत्नागिरी नगर परिषद खोदकामात आघाडीवर असली तरी, नागरिकांना मूलभूत सोयी-सुविधा पुरवण्यात मागे पडत असल्याची चर्चा शहरात आहे. अशा घटनांमुळे सीएनजी पुरवठ्यासारख्या महत्त्वाच्या सेवांवर परिणाम होत आहे. सामान्यतः अशा बिघाडाची दुरुस्ती एक ते दीड तासांत पूर्ण होणे अपेक्षित आहे. मात्र, दुपारच्या जेवणाच्या वेळी झालेल्या या समस्येमुळे अनेक कुटुंबांचे हाल झाले.
महानगर गॅसची भूमिका
महानगर गॅस कंपनीने बिघाड दुरुस्त करण्यासाठी तातडीने पावले उचलली असली तरी, खोदकामाच्या नियोजनात समन्वयाचा अभाव असल्याचे नागरिकांचे म्हणणे आहे. यापुढे अशा घटना टाळण्यासाठी रनप आणि गॅस कंपन्यांमध्ये चांगल्या समन्वयाची गरज असल्याचे मत व्यक्त होत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:13 12-04-2025
