रत्नागिरी: भाड्याने ट्रीपला नेलेली कार परत न करता मालकाची फसवणूक केल्याचा खळबळजनक प्रकार रत्नागिरीत उघडकीस आला आहे. एका चालकाने आपल्याच मालकाची सुमारे ६ लाख ५० हजार रुपये किमतीची कार घेऊन पोबारा केला असून, याप्रकरणी रत्नागिरी शहर पोलीस ठाण्यात संशयित आरोपीविरुद्ध गुन्हा दाखल करण्यात आला आहे.
नेमकी घटना काय?
फिर्यादी संदीप एकनाथ चव्हाण (वय ४३, रा. प्रभानवली-खैरवाडी, ता. लांजा) हे व्यावसायिक असून त्यांच्या मालकीची पांढऱ्या रंगाची हुंदाई ऑरा (MH-08-BE-0466) ही गाडी आहे. या गाडीवर संशयित आरोपी तन्मय चंद्रकांत पाटील ऊर्फ गंगावणे (रा. चाफवली, ता. संगमेश्वर) हा चालक म्हणून काम करत होता.
२६ एप्रिल २०२६ रोजी तन्मयने गाडीला भाडे मिळाले असून ट्रीपवर घेऊन जातो, असे मालक संदीप चव्हाण यांना सांगितले आणि तो गाडी घेऊन निघाला. मात्र, ट्रीपची वेळ उलटून गेल्यानंतरही तो परतला नाही.
शोध घेतला, पण आरोपी पसार
चव्हाण यांनी वारंवार चौकशी केली असता तन्मयने गाडी कुठे आहे याबद्दल उडवाउडवीची उत्तरे दिली. २८ एप्रिल रोजी दुपारी ही गाडी रत्नागिरी तालुक्यातील वळके धनगरवाडी येथे असल्याची माहिती चव्हाण यांना मिळाली. मात्र, ते त्या ठिकाणी पोहोचण्यापूर्वीच आरोपी तन्मय कारसह तिथून पसार झाला होता. अखेर आपली फसवणूक झाल्याचे लक्षात आल्यावर चव्हाण यांनी पोलीस ठाण्यात धाव घेतली.
भारतीय न्याय संहितेनुसार गुन्हा दाखल
संदीप चव्हाण यांच्या तक्रारीनंतर रत्नागिरी शहर पोलिसांनी आरोपी तन्मय चंद्रकांत पाटील ऊर्फ गंगावणे याच्याविरुद्ध भारतीय न्याय संहिता (BNS) २०२३ चे कलम ३१६(२) अन्वये फसवणुकीचा गुन्हा दाखल केला आहे.
असे आहे चोरीला गेलेल्या गाडीचे वर्णन:
- गाडीचे नाव: हुंदाई ऑरा (Hyundai Aura)
- रंग: पांढरा
- नंबर: MH-08-BE-0466
- किंमत: अंदाजे ६,५०,००० रुपये
पोलिसांनी या प्रकरणाचा तपास अधिक तीव्र केला असून, आरोपी आणि कारचा शोध घेण्यासाठी पथके रवाना करण्यात आली आहेत. टॅक्सी किंवा ट्रॅव्हल्स व्यवसायातील मालकांनी चालकाची पूर्ण माहिती घेतल्याशिवाय गाडी सोपवू नये, असे आवाहन या निमित्ताने केले जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:28 13-05-2026
