रत्नागिरी: रातांबे काढताना पडलेल्या कोतवडे येथील वृद्धाचा मृत्यू

रत्नागिरी:

रत्नागिरी तालुक्यातील कोतवडे येथे एक अत्यंत दुर्दैवी घटना घडली आहे. रातांबे काढण्यासाठी झाडावर चढलेल्या एका ७१ वर्षीय वृद्धाचा अचानक तोल जाऊन खाली पडल्याने मृत्यू झाला. सुरेश आबा मांडवकर (वय ७१ वर्ष, रा. कोतवडे, रत्नागिरी) असे मृत वृद्धाचे नाव आहे. जिल्हा शासकीय रुग्णालयाच्या अतिदक्षता विभागात (ICU) उपचार सुरू असताना त्यांची प्राणज्योत मालवली.

रातांबे काढताना घडली दुर्घटना

पोलिसांकडून मिळालेल्या माहितीनुसार, सुरेश मांडवकर हे शुक्रवारी, १५ मे २०२६ रोजी सकाळी साडेदहाच्या सुमारास आपल्या घरासमोरील रातांब्याच्या (कोकम) झाडाला शिडी लावून रातांबे काढण्यासाठी वर चढले होते. मात्र, रातांबे काढत असताना अचानक त्यांचा तोल सुटला आणि ते थेट जमिनीवर कोसळले. या भीषण अपघातात त्यांच्या डोक्याला गंभीर मुका मार लागला होता.

उपचार सुरू असताना प्राणज्योत मालवली

तोल जाऊन पडल्यानंतर गंभीर जखमी झालेल्या मांडवकर यांना कुटुंबियांनी तातडीने उपचारासाठी रत्नागिरीच्या जिल्हा शासकीय रुग्णालयात दाखल केले. त्यांची प्रकृती चिंताजनक असल्याने त्यांना अतिदक्षता विभागात (ICU) ठेवून त्यांच्यावर उपचार सुरू होते.

मात्र, डॉक्टरांच्या शर्थीच्या प्रयत्नांनंतरही उपचारादरम्यान शनिवारी, १६ मे रोजी सायंकाळी साडेपाचच्या सुमारास त्यांचा मृत्यू झाला. रुग्णालयातील वैद्यकीय अधिकाऱ्यांनी त्यांना तपासून मृत घोषित केले.

रत्नागिरी ग्रामीण पोलिसांत नोंद

या दुर्घटनेनंतर रत्नागिरी ग्रामीण पोलीस ठाण्यात आकस्मिक मृत्यूची नोंद करण्यात आली आहे. या घटनेमुळे कोतवडे गावावर आणि मांडवकर कुटुंबियांवर तीव्र शोककळा पसरली आहे.

दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:34 18-05-2026