रत्नागिरी: मुंबई गोवा महामार्ग पूल कामांच्या विलंबाबाबत गेल्या अनेक दिवसांपासून प्रवाशांमधून चिंता व्यक्त केली जात होती. मात्र, आता रत्नागिरी जिल्ह्यातील प्रलंबित असलेल्या महत्त्वाच्या पुलांची कामे अंतिम टप्प्यात आली असून, हे पूल लवकरच वाहतुकीसाठी पूर्णपणे खुले होणार आहेत. राष्ट्रीय महामार्ग प्राधिकरणाने दिलेल्या माहितीनुसार, या तीन मुख्य पुलांचे काम पूर्णत्वास आल्याने कोकणातील वाहतूक कोंडी सुटण्यास मोठी मदत होणार आहे. पावसाळ्याच्या पूर्वार्धात आणि उत्तरार्धात टप्प्याटप्प्याने हे मार्ग वाहतुकीसाठी उपलब्ध करून दिले जाणार आहेत.
संगमेश्वर पुलाची एक बाजू सुरू; ३० जूनपर्यंत दोन्ही बाजूंनी वाहतूक
संगमेश्वर येथील पुलाच्या कामाबाबत प्रशासनाने विशेष गती दाखवली आहे. या उड्डाणपुलावरून सध्या एका बाजूने वाहतूक सुरू करण्यात आली असून, दुसऱ्या बाजूचे काम युद्धपातळीवर सुरू आहे. येत्या ३० जूनपर्यंत या पुलाची दुसरी बाजूही वाहतुकीसाठी खुली करण्याचे उद्दिष्ट ठेवण्यात आले आहे. त्यामुळे पावसाळ्यात या भागात होणारी संभाव्य वाहतूक कोंडी टाळणे शक्य होईल.
पाली येथील पूल १७ जूनपासून सेवेत
रत्नागिरी तालुक्यातील पाली येथील पुलाचे काम पूर्ण झाले आहे. १७ जूनपासून हा पूल सर्व प्रकारच्या वाहतुकीसाठी खुला केला जाईल. पाली हा महामार्गावरील अत्यंत महत्त्वाचा आणि मुख्य टप्पा असल्याने, येथील पूल सुरू झाल्यामुळे रत्नागिरी कडून गोव्याच्या दिशेने जाणाऱ्या आणि येणाऱ्या प्रवाशांचा वेळ वाचणार आहे.
लांजा येथील उड्डाणपुलासाठी ३१ जुलैची डेडलाईन
लांजा शहरातील बाजारपेठेच्या भागातून जाणाऱ्या पुलाचे कामही आता शेवटच्या टप्प्यात आले आहे. या पुलाच्या पूर्णत्वासाठी ३१ जुलै ही अंतिम तारीख निश्चित करण्यात आली आहे. लांजा येथील ब्रिज ३१ जुलैपासून वाहतुकीस खुला झाल्यानंतर, या भागातील स्थानिक वाहतूक आणि महामार्गावरील वेगवान वाहतूक यांचे योग्य विभाजन होणार आहे.
महामार्गावरील प्रलंबित प्रश्न मार्गी
रत्नागिरी जिल्ह्यातील महामार्गाच्या चौपदरीकरणात हे तीन पूल अत्यंत कळीचे मानले जात होते. या पुलांची कामे पूर्णत्वास गेल्याने रत्नागिरी जिल्ह्यातील महामार्गाचे बहुतांशी काम आता मार्गी लागल्याचे स्पष्ट चित्र आहे. तांत्रिक अडचणी आणि इतर कारणांमुळे रखडलेले हे प्रकल्प आता प्रत्यक्ष वापरात येत असल्याने प्रवाशांना मोठा दिलासा मिळाला आहे.
