सुमारे १ कोटी ६० लाख रुपयांच्या खर्चाला मंजुरी; ६० गावांतील प्रवाशांची होणार चिखल आणि त्रासातून मुक्तता
Sawarde Railway Station FOB : कोकण रेल्वे मार्गावरील चिपळूण तालुक्यातील सावर्डे रेल्वे स्थानकासाठी अखेर पादचारी उड्डाण पूल (Foot Over Bridge – FOB) मंजूर झाला आहे. या मंजुरीमुळे स्थानिक प्रवाशांच्या अनेक वर्षांच्या जुन्या आणि न्याय्य मागणीला मोठे यश आले आहे.
कोकण रेल्वे सावर्डे प्रवासी संघटनेचे अध्यक्ष सचिन कोल्हापुरे आणि त्यांच्या सहकाऱ्यांनी या संदर्भात कोकण रेल्वे प्रशासनाकडे वेळोवेळी आग्रही मागणी केली होती. अखेर रेल्वे प्रशासनाने या मागणीची दखल घेत अधिकृत मंजुरीचे पत्र संघटनेचे अध्यक्ष सचिन कोल्हापुरे यांना सुपूर्द केले आहे.
प्रवाशांची चिखल आणि त्रासातून होणार मुक्तता
सावर्डे रेल्वे स्थानकात सध्या प्रवाशांना अनेक गंभीर समस्यांचा सामना करावा लागत आहे. या स्थानकात:
- फलट क्र. १ वर प्रवाशांना उतरण्यासाठी प्लॅटफॉर्म उपलब्ध आहे.
- मात्र, फलट क्र. २ वर योग्य प्लॅटफॉर्म उपलब्ध नसल्याने प्रवाशांना थेट चिखलात अथवा गवतामध्ये उतरावे लागते, ज्यामुळे प्रवाशांची मोठी गैरसोय होते.
- एखादी गाडी एका फलाटावर उभी असल्यास, प्रवाशांना दुसऱ्या फलाटावर जाण्यासाठी जीव धोक्यात घालून रूळ ओलांडावे लागतात किंवा मोठा त्रास सहन करावा लागतो.
या वाढत्या त्रासामुळेच ओव्हरब्रिजची मागणी सातत्याने केली जात होती. आमदार शेखर निकम यांनी देखील या समस्येचे गांभीर्य ओळखून कोकण रेल्वेकडे सातत्याने पाठपुरावा केला होता.
१ कोटी ६० लाखांच्या खर्चाला प्रशासकीय मंजुरी
प्रवासी संघटना आणि लोकप्रतिनिधींच्या सातत्यपूर्ण मागणीची दखल घेत कोकण रेल्वे प्रशासनाने सावर्डे रेल्वे स्टेशन येथील फलाट क्र. १ वरून २ कडे जाण्यासाठी पादचारी उड्डाण पूल मंजूर केला आहे. या पुलाच्या बांधकामासाठी सुमारे १ कोटी ६० लाख रुपये अंदाजित खर्चाला रेल्वे प्रशासनाने मंजुरी दिली आहे.
६० गावांतील प्रवाशांना मिळणार मोठा दिलासा
सावर्डे आणि संगमेश्वर तालुका परिसरातील सुमारे ६० गावांतील प्रवासी नियमितपणे आपल्या प्रवासासाठी सावर्डे रेल्वे स्थानकाचा वापर करत असतात. त्यामुळे या पुलाच्या मंजुरीमुळे या विस्तीर्ण परिसरातील हजारो रेल्वे प्रवाशांना मोठा दिलासा मिळणार आहे.
दरम्यान, सावर्डे रेल्वे स्थानकात इतरही अनेक मूलभूत समस्या कायम आहेत. फलाट क्र. १ वरील प्लॅटफॉर्मवर प्रवाशांना अनेकदा पावसात भिजत राहावे लागते, तर फलाट क्र. २ वर शेडची सुविधा उपलब्ध नाही. पादचारी पुलाचा प्रश्न सुटल्यामुळे आता उर्वरित प्रलंबित समस्या देखील रेल्वे प्रशासनाने प्राधान्याने आणि लवकरात लवकर सोडवाव्यात, अशी रास्त मागणी प्रवासी संघटनेचे अध्यक्ष सचिन कोल्हापुरे यांनी या प्रसंगी केली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
05:15 11-07-2026
