स्थानिक गुन्हे अन्वेषण शाखेची यशस्वी कारवाई; चोरीतील सोन्या-चांदीचे दागिने आणि गुन्ह्यात वापरलेली मोटारसायकल हस्तगत
रत्नागिरी : Nate Burglary Case प्रकरणात नाटे पोलीस ठाण्याच्या हद्दीतील ₹२.९१ लाखांच्या घरफोडीचा अखेर पाच महिन्यांनंतर उलगडा करण्यात स्थानिक गुन्हे अन्वेषण शाखेला यश आले आहे. कोल्हापूर जिल्ह्यातून दोन संशयितांना ताब्यात घेऊन चौकशी केली असता त्यांनी गुन्ह्याची कबुली दिली. आरोपींकडून चोरीस गेलेले सोन्या-चांदीचे दागिने तसेच गुन्ह्यात वापरलेली मोटारसायकल असा ₹२.६६ लाखांचा मुद्देमाल जप्त करण्यात आला आहे.
कामा निमित्त बाहेर गेल्याचा चोरट्यांनी घेतला फायदा
पोलिसांनी दिलेल्या माहितीनुसार, ४ ते ५ मार्च २०२६ दरम्यान नाटे येथील यश होम स्टेच्या मागील बाजूस श्री. शहाणे यांच्या घरात भाड्याने राहत असलेले रोशन मोठाभाऊ बच्छाव (वय २७, मूळ रा. चिचावड, ता. मालेगाव, जि. नाशिक) हे कामानिमित्त बाहेर गेले होते. त्यावेळी अज्ञात चोरट्यांनी त्यांच्या खोलीचे कुलूप तोडून आत प्रवेश केला आणि बॅगेतील सोन्या-चांदीचे दागिने व रोख रक्कम असा एकूण ₹२.९१ लाखांचा ऐवज चोरून नेला.
या प्रकरणी नाटे पोलीस ठाण्यात गुन्हा क्रमांक २५/२०२६ भारतीय न्यायसंहिता २०२३ च्या कलम ३०५(अ), ३३१(३), ३३१(४) अन्वये गुन्हा दाखल करण्यात आला होता.
गोपनीय आणि तांत्रिक माहितीच्या आधारे आरोपींचा शोध
गुन्ह्याचे गांभीर्य लक्षात घेऊन पोलीस अधीक्षक नितीन दत्तात्रय बगाटे आणि अपर पोलीस अधीक्षक बी. बी. महामुनी यांच्या मार्गदर्शनाखाली नाटे पोलीस ठाणे आणि स्थानिक गुन्हे अन्वेषण शाखेची स्वतंत्र तपास पथके तयार करण्यात आली होती.
तपासादरम्यान स्थानिक गुन्हे अन्वेषण शाखेला मिळालेल्या गोपनीय आणि तांत्रिक माहितीच्या आधारे २८ जुलै २०२६ रोजी कोल्हापूर जिल्ह्यातील हुपरी येथून दोन संशयितांना ताब्यात घेण्यात आले.
दोन आरोपींनी गुन्ह्याची कबुली
ताब्यात घेतलेल्या आरोपींची नावे पुढीलप्रमाणे आहेत –
- विकास टीपू पवार (वय २३), मूळ रा. निगडी बुद्रुक, ता. जत, जि. सांगली, सध्या रा. हुपरी, ता. हातकणंगले, जि. कोल्हापूर.
- संपत बिल्लू पवार (वय २०), मूळ रा. निगडी बुद्रुक, ता. जत, जि. सांगली, सध्या मूळ संबंध हुबनूर, जि. विजापूर (कर्नाटक).
पोलिसांच्या चौकशीत दोघांनीही घरफोडीचा गुन्हा केल्याची कबुली दिली.
₹२.६६ लाखांचा मुद्देमाल जप्त
आरोपींकडून चोरीस गेलेले ₹१.९१ लाख किमतीचे सोन्या-चांदीचे दागिने तसेच गुन्हा करण्यासाठी वापरण्यात आलेली मोटारसायकल असा एकूण ₹२.६६ लाखांचा मुद्देमाल जप्त करण्यात आला आहे.
आरोपी आणि जप्त मुद्देमाल पुढील कायदेशीर कारवाईसाठी नाटे पोलीस ठाण्याच्या ताब्यात देण्यात आला आहे.
स्थानिक गुन्हे शाखेची कारवाई
ही कारवाई पोलीस अधीक्षक नितीन दत्तात्रय बगाटे, अपर पोलीस अधीक्षक बी. बी. महामुनी यांच्या मार्गदर्शनाखाली तसेच स्थानिक गुन्हे अन्वेषण शाखेचे पोलीस निरीक्षक नितीन ढेरे यांच्या सूचनेनुसार करण्यात आली.
कारवाईत सहाय्यक पोलीस निरीक्षक संदीप ओगले, पोलीस हवालदार विजय आंबेकर, दिपराज पाटील, योगेश नार्वेकर तसेच चालक पोलीस कॉन्स्टेबल अतुल कांबळे यांनी सहभाग घेतला.
