रक्कम परत मागितल्यास जीवे मारण्याची धमकी; नाटे पोलिस ठाण्यात गुन्हा दाखल
राजापूर:
Rajapur Gold Fraud News (राजापूर सोन्याचे दागिने फसवणूक): सोन्याचे दागिने गहाण ठेवून मिळालेली रक्कम तसेच उर्वरित रोख रक्कम परत न करता तब्बल ४ लाख ३४ हजार रुपयांची फसवणूक केल्याप्रकरणी राजापूर तालुक्यातील आंबेरकोणी साखर येथील एका दांपत्याविरोधात नाटे पोलिस ठाण्यात गुन्हा दाखल करण्यात आला आहे.
आंबेरकोणी साखर येथील दांपत्यावर नाटे पोलिसांत गुन्हा
या प्रकरणी संगीता अशोक धुमाळ (वय ४०, व्यवसाय गृहिणी, रा. आंबेरकोणी साखर, ता. राजापूर) यांनी नाटे पोलिस ठाण्यात तक्रार दिली आहे. त्यांनी दिलेल्या तक्रारीवरून:
- संशयित आरोपी: रविंद्र पुनाजी राडये आणि त्यांची पत्नी ऋतिका रविंद्र राडये (दोघे रा. आंबेरकोणी साखर, ता. राजापूर).
Rajapur Gold Fraud News: पतपेढीत दागिने ठेवून रक्कम लाटली
पोलिसांनी दिलेल्या माहितीनुसार, आरोपी रविंद्र राडये यांनी त्यांची पत्नी ऋतिका हिच्या नावावर तक्रारदारांचे सोन्याचे दागिने ‘श्रमिक सहकारी पतपेढी मर्यादित, साखर-राजापूर’ येथे गहाण ठेवले. त्या बदल्यात मिळालेली ३ लाख ५४ हजार रुपयांची रक्कम घेतली.
याशिवाय तक्रारदारांकडून अतिरिक्त ८० हजार रुपयांची रोख रक्कमही आरोपींनी घेतली. अशा प्रकारे सोन्याचे दागिने आणि रोख रक्कम मिळून एकूण ४ लाख ३४ हजार रुपये आरोपींनी स्वतःच्या वैयक्तिक वापरासाठी लाटल्याचे तक्रारीत नमूद आहे.
पैसे मागितल्यावर जीवे मारण्याची धमकी
गहाण ठेवलेले दागिने सोडवण्यासाठी व दिलेली रक्कम परत मिळण्यासाठी तक्रारदारांनी आरोपींकडे वारंवार मागणी केली. मात्र, आरोपींनी रक्कम देण्यास टाळाटाळ करत उडवाउडवीची उत्तरे दिली. इतकेच नव्हे तर, पैसे पुन्हा मागितल्यास जीवे ठार मारण्याची धमकी दिल्याचेही तक्रारदार महिला संगीता धुमाळ यांनी तक्रारीत म्हटले आहे.
याप्रकरणी नाटे पोलिस ठाण्यात १७ ऑगस्ट २०२६ रोजी गुन्हा नोंदवण्यात आला असून, भारतीय न्याय संहितेच्या (BNS) संबंधित कलमांन्वये कारवाई करण्यात आली आहे. नाटे पोलिस या प्रकरणाचा अधिक तपास करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:16 19-08-2026
