निसर्ग, संस्कृती आणि ग्रामसंस्कृतीच्या जतनासाठी माचाळ परिवर्तन सेवा संस्थेचा पुढाकार
लांजा (रत्नागिरी):
Machal Lanja Tourism Rules (माचाळ लांजा पर्यटन नियमावली): रत्नागिरी जिल्ह्यातील लांजा तालुक्यातील ‘मिनी महाबळेश्वर’ म्हणून प्रसिद्ध असलेल्या माचाळ गावात पर्यटकांची वाढती संख्या लक्षात घेऊन माचाळ परिवर्तन सेवा संस्थेच्या वतीने गावात अधिकृत ‘पर्यटन नियमावलीचा फलक’ उभारण्यात आला आहे. माचाळ हे केवळ प्रेक्षणीय पर्यटनस्थळ नसून समृद्ध निसर्ग, स्थानिक संस्कृती, धार्मिक श्रद्धा, परंपरा आणि ग्रामजीवनाची स्वतंत्र ओळख जपणारे गाव आहे. त्यामुळे पर्यटनाचा आनंद घेताना या सर्वांचा समतोल राखला जावा, यासाठी हा पुढाकार घेण्यात आला आहे.
पर्यटन नियमावली फलकाचा मुख्य उद्देश
सन २०१८ पासून सामाजिक आणि ग्रामविसाच्या कार्यात सक्रीय असलेल्या माचाळ परिवर्तन सेवा संस्थेने भविष्यातील पर्यटनाची दिशा लक्षात घेऊन जबाबदार पर्यटनाचा (Responsible Tourism) संदेश दिला आहे.
या नियमावलीच्या माध्यमातून पर्यटकांना खालील बाबींचे पालन करण्याचे आवाहन करण्यात आले आहे:
- पर्यावरण संवर्धन व स्वच्छता: परिसर संपूर्णपणे प्लास्टिकमुक्त ठेवणे आणि निसर्गाची हानी न करणे.
- संस्कृतीचा आदर: स्थानिक धार्मिक स्थळे, ग्रामस्थांच्या भावना आणि परंपरेचा मान राखणे.
- शांतता व शिस्त: गावात शांतता व सामाजिक शिस्त अबाधित राखणे.
Machal Lanja Tourism Rules: स्थानिकांना रोजगार अन् निसर्गाचे जतन
माचाळमध्ये पर्यटन वाढून स्थानिकांना रोजगाराच्या व आर्थिक विकासाच्या नवीन संधी उपलब्ध व्हाव्यात ही संस्थेची भूमिका आहे. मात्र, पर्यटनाच्या ओघात माचाळची माती, माणसे, संस्कृती आणि निसर्ग यांची मूळ ओळख नष्ट होऊ नये, यासाठी अशा उपक्रमांची गरज असल्याचे संस्थेने स्पष्ट केले आहे. “पर्यटकांचे गावात मनापासून स्वागत आहे; मात्र माचाळचा निसर्ग व संस्कृती जपणे ही सर्वांची जबाबदारी आहे,” असा ठाम संदेश या फलकाद्वारे देण्यात आला आहे.
या उपक्रमावेळी अॅड. अजय विठ्ठल पाटील, दीपक गंगाराम पाटील, महादेव शंकर भोसले यांच्यासह स्थानिक ग्रामस्थ मोठ्या संख्येने उपस्थित होते.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:55 19-08-2026
