मराठी भाषेच्या मुद्द्यावरून टॅक्सी चालकांना दिलासा तर एमपीएससी परीक्षा सुधारणांसाठी समिती स्थापन करण्याचा निर्णय
अमराठी रिक्षा-टॅक्सी चालकांना मराठी शिकण्याच्या मुद्द्यावर राज्य सरकारने मोठा दिलासा दिला आहे. मुंबईतील अमराठी रिक्षा आणि टॅक्सी चालकांना मराठी भाषा शिकण्यासाठी एका वर्षाची मुदतवाढ देण्यात आली असल्याची घोषणा मुख्यमंत्री देवेंद्र फडणवीस यांनी केली. या कालावधीत रिक्षाचालकांवर कोणतीही दंडात्मक किंवा परवाना रद्द करण्याची कारवाई केली जाणार नसल्याचे त्यांनी स्पष्ट केले.
पूर्वी मराठी बोलता येत नसलेल्या रिक्षाचालकांवर परवाना रद्द करण्याची कारवाई केली जात होती. मात्र, रिक्षाचालकांच्या एका प्रतिनिधी मंडळाने मुख्यमंत्र्यांची भेट घेऊन वेळ वाढवून देण्याची मागणी केली होती. या विनंतीचा विचार करून सरकारने हा निर्णय घेतला आहे.
मुदतवाढीबाबत मुख्यमंत्र्यांचे स्पष्टीकरण
महाराष्ट्रामध्ये राहत असताना प्रत्येकाला जुजबी मराठी भाषा आलीच पाहिजे, असा पुनरुच्चार मुख्यमंत्र्यांनी केला. रिक्षा व टॅक्सी चालक मराठी शिकण्याचा प्रयत्न करत आहेत आणि भविष्यातही ते प्रयत्न सुरू ठेवतील, असा विश्वास त्यांनी व्यक्त केला.
वेगवेगळ्या वयोगटातील चालकांना तातडीने भाषा शिकणे कठीण जात असल्याने त्यांना हा अवधी देण्यात आला आहे. चालकांनी स्वतःहून वेळ मागितल्यामुळे एका वर्षाची मुदत वाढवून दिली असून, या काळात त्यांनी किमान व्यवहारी मराठी शिकून घ्यावे, असे आवाहन मुख्यमंत्र्यांनी केले.
अमराठी रिक्षा-टॅक्सी चालकांना मराठी शिकण्यासाठी मुदतवाढ; एमपीएससी परीक्षा पारदर्शक करण्यावर भर
रिक्षाचालकांच्या मुद्द्यासोबतच मुख्यमंत्र्यांनी एमपीएससी (MPSC) परीक्षांच्या पारदर्शकतेवरही भाष्य केले. औषध निरीक्षक परीक्षेचा पेपर अनेक लोकांपर्यंत पोहोचल्याच्या बातम्यांमध्ये तथ्य नसून, तो केवळ एका व्यक्तीकडे गेला होता, असे त्यांनी स्पष्ट केले. असे असले तरी परीक्षांची सुचिता राखण्यासाठी एमपीएससीने ती परीक्षा पूर्णपणे रद्द केली आहे.
परीक्षेत सुधारणांसाठी विशेष समिती
एमपीएससीच्या आगामी सर्व परीक्षा अत्यंत पारदर्शक पद्धतीने पार पडाव्यात आणि कोणताही गैरप्रकार होऊ नये, यासाठी एक विशेष समिती नेमण्यात आल्याची माहिती मुख्यमंत्र्यांनी दिली. या मुद्द्यावर कोणीही विनाकारण राजकारण करू नये, असे सांगत राज्य सरकार सर्व परीक्षा पारदर्शक करण्यासाठी कटिबद्ध असल्याचे आश्वासन त्यांनी दिले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
09:18 28-08-2026
