खांदाट गवळवाडीतील चिरणी फाट्याजवळ अपघात
Chiplun Bus Accident ची दुर्दैवी घटना शनिवारी दुपारी ३ वाजण्याच्या सुमारास चिपळूण-धामणंद मार्गावरील खांदाट गवळवाडी येथील चिरणी फाट्याजवळ घडली. या अपघातात १८ प्रवाशांसह दोन चालक आणि एका वाहकासह एक एकूण २१ जण जखमी झाले आहेत. अपघाताची माहिती मिळताच स्थानिक ग्रामस्थांच्या मदतीने सर्व जखमींना उपचारासाठी तातडीने कामथे येथील उपजिल्हा रुग्णालयात दाखल करण्यात आले आहे.
धोकादायक वळणावर नियंत्रण सुटल्याने समोरासमोर धडक
मिळालेल्या प्राथमिक माहितीनुसार, चिपळूणहून चोरवणेच्या दिशेने जाणारी एसटी बस आणि कासईहून चिपळूणच्या दिशेने येणारी एसटी बस खांदाट गवळवाडी येथील वळणावर समोरासमोर आदळल्या. रस्त्यावरील तीव्र उतार आणि धोकादायक वळणावर वाहनावरील नियंत्रण सुटल्याने हा अपघात घडल्याचे प्रथमदर्शनी समोर येत आहे. ही धडक इतकी जोरदार होती की दोन्ही बसेसचे मोठे नुकसान झाले असून प्रवाशांच्या डोक्याला, जबड्याला व हनुवटीला गंभीर दुखापत झाली आहे.
Chiplun Bus Accident प्रकरणी पोलिसांकडून अधिक तपास सुरू
अपघाताचे वृत्त समजताच परिसरातील नागरिकांनी घटनास्थळी धाव घेत तातडीने मदतकार्य सुरू केले आणि जखमींना बसेसमधून बाहेर काढून रुग्णालयात हलवले. दुर्घटनेची माहिती मिळताच चिपळूण पोलीस ठाण्याचे पथक घटनास्थळी दाखल झाले असून त्यांनी पंचनामा केला आहे. अपघाताचे नेमके कारण अद्याप स्पष्ट झाले नसून पोलीस या प्रकरणाचा अधिक तपास करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:58 31-08-2026
