पूर्वा चव्हाण ह्यांनी पटकावला प्रथम क्रमांक
रत्नागिरी: Deepsaj Alankar Spardha संदर्भात रत्नागिरीतून महत्त्वाची माहिती समोर आली आहे. पालकमंत्री उदय सामंत, आमदार किरण सामंत तसेच नगराध्यक्षा शिल्पा सुर्वे यांच्या मार्गदर्शनाखाली नगरसेविका सौ. पूजा दीपक पवार यांच्यावतीने रत्नागिरी नगरपरिषद प्रभाग क्रमांक ५ मध्ये प्रथमच आयोजित करण्यात आलेली “दीपसाज अलंकार स्पर्धा २०२६” अत्यंत उत्साहात आणि महिलांच्या उत्स्फूर्त सहभागाने संपन्न झाली. या स्पर्धेत सौ. पूर्वा विकास चव्हाण यांनी उत्कृष्ट कलागुणांचे प्रदर्शन करत प्रथम क्रमांक पटकावला आहे.
प्रभागातील महिलांच्या कलागुणांना वाव देण्यासाठी २२ आणि २३ ऑगस्ट २०२६ रोजी ही स्पर्धा आयोजित करण्यात आली होती. परीक्षकांनी सहभागी महिलांच्या घरी जाऊन थेट परीक्षण केले. महिलांची कल्पकता, सजावट, दिलेला संदेश आणि घेतलेली मेहनत विचारात घेऊन विजेत्यांची निवड करण्यात आली. महिलांचा वाढता प्रतिसाद पाहून उत्तेजनार्थ बक्षीसांच्या संख्येत वाढ करण्यात आली.
या स्पर्धेदरम्यान नगरसेविका सौ. पूजा पवार यांनी प्रत्येक स्पर्धकाच्या घरी प्रत्यक्ष भेट देऊन महिलांना प्रोत्साहित केले आणि सहभागी सर्व महिलांना भेटवस्तू देऊन सन्मानित केले. या माध्यमातून स्पर्धकांनी सामाजिक संदेश देणारे उपक्रमही सादर केले.
स्पर्धेत सानिका सुर्वे यांनी द्वितीय, तर कांचन सामंत यांनी तृतीय क्रमांक मिळवला. उत्तेजनार्थ बक्षीसे रश्मी चव्हाण, श्रद्धा पाटोळे, सेजल शिंदे, आदिती चिकोडीकर आणि अनुजा कालकर यांना प्रदान करण्यात आली. तसेच दीपिका कुबल यांचा विशेष सन्मान करण्यात आला. १ सप्टेंबर रोजी आयोजित भव्य कार्यक्रमात मान्यवरांच्या हस्ते विजेत्यांना गौरविण्यात आले.
या स्पर्धेचे परीक्षण सौ. सोनाली संदेश सावंत आणि ॲड. अस्मिता अमित चांदोरकर यांनी केले. स्पर्धा यशस्वी करण्यासाठी प्रभागातील महिला कार्यकर्त्या व कार्यकर्त्यांनी विशेष मेहनत घेतली. सर्व सहभागी स्पर्धक व सहकार्य करणाऱ्यांचे नगरसेविका सौ. पूजा दीपक पवार आणि श्री. दीपक पवार यांनी आभार व्यक्त केले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:22 03-09-2026
