मानवी मनोऱ्यांचे थरार; पाचल, मंडणगड आणि संगमेश्वरमध्ये विक्रमी थरांची नोंद
रत्नागिरी : ढोल-ताशांचा दणदणाट, ‘गोविंदा आला रे आला’चा जयघोष आणि गोविंदा पथकांच्या चित्तथरारक मानवी मनोऱ्यांच्या कामगिरीने रत्नागिरी जिल्ह्यात दहीहंडी उत्सव मोठ्या उत्साहात पार पडला. रत्नागिरीसह राजापूर, संगमेश्वर, चिपळूण, दापोली, मंडणगड आणि खेड तालुक्यांत हा सोहळा जल्लोषात साजरा करण्यात आला. विविध ठिकाणी आयोजित मोठ्या रकमेच्या दहीहंड्यांमुळे गोविंदा पथकांमध्ये थरांची चुरस पाहायला मिळाली.
Dahi Handi Festival Ratnagiri मध्ये पाचल येथे १.५५ लाखांची विक्रमी हंडी
राजापूर तालुक्यातील पाचल येथे तब्बल १ लाख ५५ हजार ५५५ रुपयांची विक्रमी दहीहंडी बांधण्यात आली होती. सात थरांचा मानवी मनोरा रचत गोविंदा पथकाने ही हंडी फोडून पाचलच्या इतिहासात नव्या विक्रमाची नोंद केली. या स्पर्धेत जिल्ह्याबाहेरील गोविंदा पथकांनीही हजेरी लावल्यामुळे उत्सवाची रंगत अधिकच वाढली.
मंडणगड आणि संगमेश्वरमधील थरारक कामगिरी
मंडणगडमध्ये ओमसाई गोविंदा पथक आणि भिंगळोली येथील कन्हैया गोविंदा पथकाने सात मानवी थरांचा मनोरा रचत तालुक्याच्या इतिहासात नवा विक्रम प्रस्थापित केला. दुसरीकडे, संगमेश्वर येथे शिवसेना (उद्धव बाळासाहेब ठाकरे) पक्षाच्या वतीने आयोजित हिंदुहृदयसम्राट दहीहंडी उत्सवात श्री निनावी देवी गोविंदा पथकाने मानाची दहीहंडी फोडली.
महिला गोविंदा ठरल्या विशेष आकर्षण
संगमेश्वर येथील उत्सवात महिला गोविंदा पथक विशेष आकर्षण ठरले. तेथे महिलांसाठी डोळ्यांवर पट्टी बांधून काठीच्या सहाय्याने हंडी फोडण्याचा अनोखा उपक्रम राबवण्यात आला. याशिवाय दापोली तालुक्यातील ब्राह्मणवाडी येथेही ग्रामस्थ, महिला व बालकांच्या उत्साही सहभागाने पारंपरिक पद्धतीने दहीहंडी साजरी करण्यात आली. उत्सवाच्या पार्श्वभूमीवर कायदा व सुव्यवस्थेचा प्रश्न निर्माण होऊ नये यासाठी पोलीस प्रशासनाने ठिकठिकाणी चोख बंदोबस्त ठेवला होता.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:49 07-09-2026
