विद्यार्थी, पालक आणि तज्ज्ञांकडून सुधारणांसाठी निवेदने आमंत्रित; वांद्रे येथील चेतना कॉलेजमध्ये होणार बैठक
रत्नागिरी:
Exam Reforms Task Force Konkan च्या पार्श्वभूमीवर राज्यातील विविध भरती परीक्षा अधिक सुरक्षित, पारदर्शक, विश्वासार्ह आणि उमेदवाराभिमुख करण्यासाठी महाराष्ट्र शासनाने स्थापन केलेली उच्चस्तरीय समिती कोकण विभागाच्या दौऱ्यावर येत आहे. शासनामार्फत घेण्यात येणाऱ्या भरती परीक्षांची पद्धत अधिक गतिमान व त्रुटीमुक्त व्हावी यासाठी या समितीची स्थापना करण्यात आली आहे.
या पार्श्वभूमीवर कोकण विभागातील विद्यार्थी, स्पर्धा परीक्षा परीक्षार्थी, पालक, शैक्षणिक संस्था व तज्ज्ञांकडून परीक्षा पद्धतीतील सुधारणांबाबत लेखी सूचना, अभिप्राय व निवेदने मागविण्यात आली आहेत.
२९ सप्टेंबरला मुंबईत विशेष बैठकीचे आयोजन
समितीचे अध्यक्ष व सदस्य २९ सप्टेंबर रोजी सकाळी ११ वाजता चेतना कॉलेज, वांद्रे (पूर्व), मुंबई येथे भेट देणार आहेत. कोकण विभागातील संबंधित घटकांना समितीसमोर आपले म्हणणे व सूचना थेट मांडता याव्यात, यासाठी या बैठकीचे आयोजन करण्यात आले आहे.
समितीच्या भेटीदरम्यान प्रत्यक्ष भेटून चर्चा करण्यासाठी वेळ मागणे किंवा आपले लेखी निवेदन सादर करण्यासाठी २३ सप्टेंबरपर्यंतची मुदत देण्यात आली आहे.
Exam Reforms Task Force Konkan: अर्ज व निवेदने सादर करण्याचे पर्याय
इच्छुक नागरिकांना व संस्थांना २३ सप्टेंबरपर्यंत पुढील पर्यायांद्वारे आपले अर्ज सादर करता येतील:
प्रत्यक्ष अर्ज सादर करणे: अपर जिल्हा उपजिल्हाधिकारी यांचे कार्यालय, प्रशासकीय इमारत, ९ वा मजला, शासकीय वसाहत, वांद्रे (पूर्व), मुंबई ४०० ०५१ येथे सकाळी ११:०० ते सायंकाळी ५:३० या वेळेत पत्र/निवेदन देता येईल.
ई-मेलद्वारे अर्ज: इच्छुक आपले अभिप्राय किंवा भेटीच्या वेळेसाठी konkan-examreformstaskforce@maharashtra.gov.in या अधिकृत ई-मेलवर अर्ज पाठवू शकतात.
भरती प्रक्रियेत अमूलाग्र सुधारणा घडवून आणण्याच्या दृष्टीने ही मोहीम अत्यंत महत्त्वपूर्ण आहे. त्यामुळे कोकण विभागातील सर्व स्पर्धा परीक्षा परीक्षार्थी, विद्यार्थी, पालक आणि शिक्षणतज्ज्ञांनी या प्रक्रियेत सक्रिय सहभाग घेऊन आपल्या महत्त्वपूर्ण सूचना सादर कराव्यात, असे आवाहन प्रशासनाकडून करण्यात आले आहे.
