प्रारूप मतदार यादीवर हरकत व दुरुस्तीसाठी १९, २०, २५ व २६ सप्टेंबर रोजी विशेष शिबिरांचे आयोजन
खेड:
मतदार यादी अचूक आणि परिपूर्ण करण्याच्या उद्देशाने नागरिकांनी प्रारूप मतदार यादीत आपले नाव तपासून घ्यावे. यादीत नाव नसल्यास किंवा तपशिलात काही त्रुटी असल्यास ३० सप्टेंबरपर्यंत दावे, हरकती व दुरुस्तीचे अर्ज दाखल करावेत, असे आवाहन उपजिल्हा निवडणूक अधिकारी राहुल गायकवाड यांनी केले आहे. माहिती व जनसंपर्क महासंचालनालयाच्या जिल्हा माहिती कार्यालयातर्फे खेड येथील शिवसेना सार्वजनिक गणेशोत्सव मंडळात आयोजित ‘लोकसंवाद २०२६’ कार्यक्रमादरम्यान ते बोलत होते. विशेष पुनरीक्षण कार्यक्रमाची व्याप्ती
खेड येथे पार पडलेल्या या कार्यक्रमात उपजिल्हा निवडणूक अधिकारी राहुल गायकवाड यांनी विशेष पुनरीक्षण कार्यक्रमाची (एसआयआर) सविस्तर माहिती दिली. मतदान केंद्रस्तरीय अधिकाऱ्यांनी (बीएलओ) केलेल्या गृहभेटीच्या पहिल्या टप्प्यानंतर ३१ ऑगस्ट रोजी प्रारूप मतदार यादी प्रसिद्ध करण्यात आली आहे. या यादीसोबतच मयत, अनुपस्थित, स्थलांतरित आणि दुबार नोंद असलेल्या मतदारांची वगळण्यात आलेली (एसडी) यादीदेखील प्रसिद्ध करण्यात आल्याचे त्यांनी स्पष्ट केले. याद्यांची उपलब्धता आणि विशेष शिबिरांचे नियोजन
प्रसिद्ध करण्यात आलेल्या दोन्ही याद्या पाहण्यासाठी जिल्हाधिकारी कार्यालय, प्रांत कार्यालय, तहसील कार्यालय, नगरपालिका आणि संबंधित मतदान केंद्रांवर उपलब्ध करून देण्यात आल्या आहेत. प्रारूप मतदार यादीवर दावे व हरकती दाखल करण्यासाठी ३० सप्टेंबरपर्यंत मुदत देण्यात आली आहे. नागरिकांच्या सोयीसाठी १९, २०, २५ आणि २६ सप्टेंबर रोजी बीएलओ संबंधित मतदान केंद्रांवर प्रत्यक्ष उपस्थित राहून अर्ज स्वीकारणार आहेत. संबंधित नमुन्यांची माहिती आणि ऑनलाईन सुविधा
१८ वर्षे पूर्ण झालेल्या नवमतदारांसाठी नमुना ६, मयत किंवा स्थलांतरित मतदारांचे नाव वगळण्यासाठी नमुना ७, तर नाव, वय, लिंग, पत्ता किंवा छायाचित्रातील दुरुस्ती तसेच दुबार ओळखपत्र मिळवण्यासाठी नमुना ८ भरावा लागणार आहे. ऑफलाईन अर्जांसोबतच भारत निवडणूक आयोगाच्या ‘ECINet’ ॲप आणि सिटीझन सर्व्हिस पोर्टलद्वारे ऑनलाईन अर्ज करण्याची सोय उपलब्ध आहे. ऑनलाईन प्रक्रियेसाठी पडताळणी व ओटीपीद्वारे डिजिटल स्वाक्षरीची सुविधा देण्यात आली आहे. जनजागृती आणि नवमतदार नोंदणी मोहीम
नवमतदारांच्या नोंदणीसाठी महाविद्यालयांमध्ये विशेष शिबारे घेण्याच्या सूचना देण्यात आल्या आहेत. याशिवाय गणेशोत्सव मंडळांच्या माध्यमातून मतदार नोंदणीबाबत जनजागृती आणि विशेष कॅम्प आयोजित केले जाणार आहेत. नागरिकांनी मतदानाचा हक्क बजावण्यासाठी मतदार यादीतील आपले नाव आणि तपशील वेळेत तपासून घ्यावेत, असे आवाहन राहुल गायकवाड यांनी केले आहे.
