महाराष्ट्र सागरी मासेमारी अधिनियमाचे उल्लंघन; ४ ते ५ दिवसांत एकूण ३ नौकांवर मत्स्यव्यवसाय विभागाची धडक कारवाई
Devgad illegal Fishing Action मुळे सिंधुदुर्ग आणि रत्नागिरी किनारपट्टीवरील अवैध मासेमारीचा प्रश्न पुन्हा एकदा चर्चेत आला आहे. देवगड व विजयदुर्ग समुद्रात महाराष्ट्र सागरी मासेमारी अधिनियमाचे उल्लंघन करत अवैध पर्ससीन मासेमारी करणाऱ्या रत्नागिरी येथील दोन नौकांवर मत्स्यव्यवसाय विभागाने धडक कारवाई करत त्या जप्त केल्या आहेत. याशिवाय कारवाईदरम्यान पळून गेलेल्या एका नौकेवरही कायदेशीर कारवाई केली जाणार असल्याचे प्रशासनाने स्पष्ट केले आहे.
३ वाव पाण्यात अवैध मासेमारी; २० परप्रांतीय खलाशी ताब्यात
मिळालेल्या माहितीनुसार, २७ सप्टेंबर रोजी सकाळी देवगड-विजयदुर्ग समुद्रात अवघ्या ३ वाव पाण्यात अवैध पद्धतीने पर्ससीन मासेमारी करताना रत्नागिरी येथील नौकामालक अर्शद लतीफ पावसकर यांची नौका जप्त करण्यात आली. या नौकेची तपासणी केली असता त्यात २० परप्रांतीय खलाशी आढळून आले.
दुसऱ्या दिवशी पुन्हा एका नौकेवर कारवाई
या कारवाईच्या दुसऱ्याच दिवशी, म्हणजेच २८ सप्टेंबर रोजी तारामुंबरी आणि कुणकेश्वर येथील समुद्रात अवैध पर्ससीन मासेमारी करताना रत्नागिरी येथील ‘इब्राहिम युसूफ’ ही नौका मत्स्यव्यवसाय विभागाच्या अधिकाऱ्यांनी जप्त केली. ही नौका देवगड बंदरात आणण्यात आली असून या नौकेतही २० परप्रांतीय खलाशी आढळून आले आहेत.
कारवाई पाहून ‘हरिकृपा-१’ नौकेने काढला पळ
२८ सप्टेंबर रोजीच देवगड येथील ‘हरिकृपा-१’ ही नौकादेखील अवैध पर्ससीन मासेमारी करत होती. मात्र, मत्स्यव्यवसाय विभागाची नौका कारवाईसाठी येत असल्याचे लक्षात येताच ‘हरिकृपा-१’ च्या चालकाने तेथून पळ काढला. या नौकेवरही महाराष्ट्र सागरी मासेमारी अधिनियमानुसार कठोर कारवाई केली जाईल, असे अधिकाऱ्यांनी सांगितले.
स्थानिक पारंपरिक रापण संघाकडून समाधान व्यक्त
सिंधुदुर्ग मत्स्यव्यवसाय साहाय्यक आयुक्तांच्या मार्गदर्शनाखाली देवगडचे परवाना अधिकारी किरण वाघमारे यांनी सुरक्षारक्षकांच्या मदतीने ही धडक मोहीम राबवली. गेल्या ४-५ दिवसांत तब्बल ३ पर्ससीन नौकांवर कारवाई करण्यात आली आहे. यापूर्वी स्थानिक पारंपरिक रापण संघाने प्रशासनाला निवेदन देऊन अवैध पर्ससीन मासेमारीवर बंदी घालण्याची मागणी केली होती. प्रशासनाने तातडीने कठोर पावले उचलल्याने स्थानिक मासेमारांनी समाधान व्यक्त केले आहे.
