Asian Games 2026 Archery: भारतीय महिला कंपाऊंड तिरंदाजी संघाची सुवर्णकामगिरी; चीनचा पराभव करत जागतिक विक्रमाशी बरोबरी!

आयची-नागोया येथे भारताचे सातवे सुवर्णपदक; चिकिता, पृथिका आणि ज्योती सुरेखा यांच्या त्रिकुटाचा ऐतिहासिक विजय

आयची-नागोया (जपान): Asian Games 2026 Archery स्पर्धेत भारतीय महिलांच्या कंपाऊंड तिरंदाजी संघाने चमकदार कामगिरी करत सुवर्णपदकाला गवसणी घातली आहे. बुधवारी जपानमधील आयची-नागोया येथील ओकाझाकी चुओ सोगो पार्क येथे पार पडलेल्या अटीतटीच्या अंतिम सामन्यात भारतीय महिला संघाने चीनवर २३८-२३४ असा दणदणीत विजय मिळवून आपले विजेतेपद कायम राखले. या ऐतिहासिक विजयासोबतच भारतीय त्रिकुटाने विश्वविक्रमाशीही बरोबरी साधली आहे.

Asian Games 2026 Archery: चीनवर वर्चस्व अन् ‘परफेक्ट १०’चा धडाका

अंतिम सामन्यात चिकिता तनिपार्थी, पृथिका प्रदीप आणि ज्योती सुरेखा वेन्नम या भारतीय त्रिकुटाने सुरुवातीपासूनच उत्कृष्ट लय दाखवली.

• पहिला राऊंड (एंड): भारतीय संघाने सलग ‘परफेक्ट १०’ गुण मिळवत ६०-५८ असा पहिला राऊंड जिंकून दमदार सुरुवात केली.
• दुसरा राऊंड: दुसऱ्या फेरीतही वर्चस्व कायम ठेवत भारताने ६०-५८ अशी आघाडी घेतली.
• तिसरा अन् अंतिम राऊंड: अंतिम फेरीपूर्वी १७८-१७६ अशी मजबूत स्थिती गाठल्यानंतर, भारतीय महिलांनी पुन्हा एकदा सहा ‘परफेक्ट १०’ गुण नोंदवत २३८-२३४ अशा फरकाने सुवर्णपदकावर आपले नाव कोरले.

विश्वविक्रमाशी बरोबरी अन् भारताचे सातवे सुवर्ण

या विजयामुळे भारताने २०१४ मध्ये इंचॉन आशियाई क्रीडा स्पर्धेत दक्षिण कोरियाने नोंदवलेल्या २३८ गुणांच्या जागतिक, आशियाई व आशियाई क्रीडा स्पर्धेतील विक्रमाशी बरोबरी केली. चालू २०२६ च्या आशियाई क्रीडा स्पर्धेतील भारताचे हे एकूण सातवे सुवर्णपदक ठरले आहे.

या विजयामुळे ज्योती सुरेखा वेन्नम हिने आशियाई क्रीडा स्पर्धेतील तिचे चौथे सुवर्णपदक जिंकण्याचा पराक्रम केला, तर चिकिता तनिपार्थी आणि पृथिका प्रदीप यांनी आपल्या कारकिर्दीतील पहिलेवहिले आशियाई सुवर्णपदक पटकावले.

उपांत्य फेरीत कोरियाचा पराभव; चीनला रौप्य तर कोरियाला कांस्य

तत्पूर्वी, अत्यंत चुरशीच्या ठरलेल्या उपांत्य फेरीत भारताने दक्षिण कोरियावर २३४-२३३ असा अवघ्या एका गुणाने थरारक विजय मिळवून फायनल गाठली होती.

या स्पर्धेत वुनिअर, यु वांग आणि फँगयाओ वेई यांचा समावेश असलेल्या चीनच्या संघाला रौप्यपदकावर समाधान मानावे लागले. तर पार्क जुंगयून, पार्क येरिन आणि काँग येओनसेओ यांच्या दक्षिण कोरियाच्या संघाने चायनीज तैपेईचा पराभव करत कांस्यपदक पटकावले. यापूर्वी भारताने २०२३ च्या हांगझोऊ आशियाई क्रीडा स्पर्धेतही महिला कंपाऊंड प्रकारात सुवर्णपदक जिंकले होते.

दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
09:57 30-09-2026