२ ते ५ डिसेंबरदरम्यान इटली येथे पार पडणार नववी कॅरम वर्ल्ड चॅम्पियनशिप; शिवछत्रपती पुरस्कारविजेत्या आकांक्षाचा ३६ सुवर्णपदकांसह ६२ पदकांचा झगमगता प्रवास
आकांक्षा कदम इटलीतील वर्ल्ड चॅम्पियनशिपमध्ये भारताचे प्रतिनिधित्व करणार असल्याने रत्नागिरीच्या क्रीडा क्षेत्रात आनंदाचे वातावरण पसरले आहे. आंतरराष्ट्रीय कॅरम खेळाडू आणि ‘शिवछत्रपती’ क्रीडा पुरस्कार विजेती, रत्नागिरी जिल्ह्याचे नाव जागतिक स्तरावर उज्ज्वल करणारी आकांक्षा कदम येत्या २ ते ५ डिसेंबर या कालावधीत इटली येथे आयोजित नवव्या कॅरम वर्ल्ड चॅम्पियनशिपमध्ये (9th Carrom World Championship) भारतीय संघाचे प्रतिनिधित्व करणार आहे.
पुरस्कार आणि सन्मानाची परंपरा
रत्नागिरी जिल्ह्यातील देवरूख येथील रहिवासी असलेल्या आकांक्षाच्या अतुलनीय क्रीडा योगदानाची दखल विविध स्तरांवर घेण्यात आली आहे. तिला महाराष्ट्र राज्य शासनाचा मानाचा ‘शिवछत्रपती सर्वोत्कृष्ट खेळाडू राज्य क्रीडा पुरस्कार’, ‘जिल्हा क्रीडा पुरस्कार’ (गुणवंत खेळाडू) आणि रत्नागिरी कऱ्हाडे ब्राह्मण सहकारी संघाचा ‘राणी लक्ष्मीबाई गौरव पुरस्कार’ अशा अनेक प्रतिष्ठित पुरस्कारांनी गौरवण्यात आले आहे.
बालवयापासूनच सुवर्ण पदकांची लुटालूट
आकांक्षाचा क्रीडा प्रवास थक्क करणारा आहे. वयाच्या अवघ्या १३ व्या वर्षी आंतरराष्ट्रीय कॅरम स्पर्धेत पदार्पण करत तिने मालदीव येथे देशाला सांघिक व वैयक्तिक अशा दोन्ही गटांत सुवर्णपदक मिळवून दिले होते. यानंतर वयाच्या १४ व्या वर्षीच तिने राज्यस्तरीय महिला ओपन गटाचे विजेतेपद पटकावले. याशिवाय राष्ट्रीय शालेय कॅरम स्पर्धेत १ सुवर्ण व २ रौप्य पदके, सलग तीन वेळा ज्युनिअर राज्यस्तरीय गटाचे विजेतेपद आणि राज्य स्तरावरील महिलांच्या एकेरी ओपन गटाचे तब्बल १५ वेळा विजेतेपद पटकावण्याचा विक्रम तिने केला आहे.
३६ सुवर्णपदकांसह एकूण ६२ पदकांचा टप्पा
आकांक्षाने आपल्या कारकिर्दीत आतापर्यंत एकूण ६२ पदकांची कमाई केली आहे. यामध्ये ३६ सुवर्णपदके, १३ रौप्यपदके आणि १३ कांस्यपदकांचा समावेश आहे. विशेष म्हणजे, यातील ४ सुवर्ण आणि १ रौप्यपदक हे आंतरराष्ट्रीय पातळीवरील आहे, तर ४ सुवर्ण आणि २ रौप्यपदके राष्ट्रीय स्तरावरील आहेत. आता इटलीतील कॅरम वर्ल्ड चॅम्पियनशिपमध्ये तिच्या या सुवर्ण घोडदौडीकडे संपूर्ण क्रीडाप्रेमींचे लक्ष लागले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
01:05 03-10-2026
