इतर वाहनांना धोका निर्माण होईल अशा पद्धतीने वाहन चालवल्याप्रकरणी कारवाई; रत्नागिरी ग्रामीण पोलिसांत गुन्हा दाखल
रत्नागिरी :
पोमेंडी बुद्रुक ते चांदेराई जाणाऱ्या सार्वजनिक रस्त्यावर इतर वाहनांना धोका निर्माण होईल अशा पद्धतीने बेदरकारपणे डंपर चालवल्याप्रकरणी एका चालकाविरोधात रत्नागिरी ग्रामीण पोलीस ठाण्यात गुन्हा दाखल करण्यात आला आहे. ही कारवाई १ ऑक्टोबर रोजी सायंकाळी ६.५० वाजेच्या सुमारास टिके शिंदेवाडी येथे करण्यात आली.
राजू बसप्पा दळवाय (वय २७, मूळ रा. मदगुदी, विजापूर; सध्या रा. कुरतडे, रत्नागिरी) असे गुन्हा दाखल करण्यात आलेल्या डंपरचालकाचे नाव आहे.
पोलीस हेड कॉन्स्टेबलच्या तक्रारीवरून कारवाई
याबाबत पोलीस हेड कॉन्स्टेबल प्रवीण पाटील यांनी रत्नागिरी ग्रामीण पोलीस ठाण्यात अधिकृत तक्रार दिली आहे. मिळालेल्या माहितीनुसार, संशयित राजू दळवाय हा त्याच्या ताब्यातील सहाचाकी डंपर (MH 08 AZ 4441) घेऊन पोमेंडी बुद्रुक ते चांदेराई मार्गावरून जात होता. टिके शिंदेवाडी येथील सार्वजनिक रस्त्यावर तो डंपर बेदरकारपणे आणि इतर वाहनांना धोका निर्माण होईल अशा पद्धतीने चालवत असल्याचे निदर्शनास आल्याने पोलिसांनी तत्काळ कारवाई केली.
या प्रकरणी राजू दळवाय याच्याविरोधात भारतीय न्याय संहिता, २०२३ मधील कलम २८१ अन्वये गुन्हा दाखल करण्यात आला आहे. या घटनेचा पुढील तपास रत्नागिरी ग्रामीण पोलीस करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:32 03-10-2026
