रत्नागिरी दौरा अर्धवट सोडून सामंत गोव्यात दाखल; कुटुंबीयांचे सांत्वन, पुण्यात होणार अंत्यसंस्कार
पणजी (गोवा) : ज्येष्ठ अभिनेते नाना पाटेकर यांच्या आकस्मिक निधनाचे वृत्त समजताच महाराष्ट्र राज्याचे उद्योग व मराठी भाषा मंत्री उदय सामंत यांनी तात्काळ गोवा गाठून त्यांच्या पार्थिवाचे अंत्यदर्शन घेतले. गोवा मेडिकल कॉलेज येथे जाऊन त्यांनी नाना पाटेकर यांच्या पार्थिवावर पुष्पचक्र अर्पण करत भावपूर्ण श्रद्धांजली वाहिली, तसेच शोकाकुल कुटुंबीयांची भेट घेऊन त्यांचे सांत्वन केले.
रत्नागिरी दौरा सोडून तातडीने गोव्यात दाखल :
उद्योगमंत्री उदय सामंत हे पूर्वनियोजित दौऱ्यानुसार रत्नागिरी येथे उपस्थित होते. मात्र, जिवलग मित्र आणि मार्गदर्शक नाना पाटेकर यांच्या निधनाची बातमी समजताच त्यांनी रत्नागिरीतील कार्यक्रम सोडून थेट गोव्याकडे धाव घेतली. गोवा मेडिकल कॉलेजमध्ये पोहोचून त्यांनी नाना पाटेकर यांच्या पार्थिवाचे अंत्यदर्शन घेत आदरांजली वाहिली.
चाहते व मराठी कलाकारांची मोठी गर्दी :
गोवा मेडिकल कॉलेज परिसरात नाना पाटेकर यांचे पार्थिव ठेवण्यात आले होते. यावेळी आपल्या लाडक्या अभिनेत्याचे अखेरचे दर्शन घेण्यासाठी चाहत्यांनी आणि नागरिकांनी मोठी गर्दी केली होती. तसेच मराठी चित्रपटसृष्टीतील अनेक नामवंत अभिनेते व कलाकारही गोव्यात दाखल झाले होते. मंत्री उदय सामंत यांनी यावेळी उपस्थित कुटुंबीय, नातेवाईक आणि निकटवर्तीयांशी संवाद साधून त्यांना धीर दिला.
गोवा मेडिकल कॉलेज येथील औपचारिकता पूर्ण झाल्यानंतर नाना पाटेकर यांचे पार्थिव विशेष विमानाने त्यांच्या पुणे येथील निवासस्थानी नेण्यात येत आहे. पुण्यात त्यांच्या पार्थिवावर अंत्यसंस्कार करण्यात येणार असून, कलाक्षेत्रासह सामाजिक क्षेत्रातील मान्यवर मोठ्या संख्येने उपस्थित राहणार आहेत.
