नांदेडच्या घटनेची मंत्रिमंडळ बैठकीत गंभीर दखल; मायक्रो फायनान्स कंपन्यांवर कारवाईसाठी रिझर्व्ह बँकेला पत्र पाठवणार
मुंबई : Loan Recovery Farmer Harassment Warning संदर्भात कर्जवसुलीच्या नावाखाली शेतकऱ्यांना दमदाटी करणाऱ्या वित्तीय संस्थांवर राज्य सरकारकडून कठोर कारवाईचा बडगा उगारला जाणार आहे. कर्जवसुलीसाठी दमदाटी केल्याप्रकरणी तातडीने शेतकऱ्यांची तक्रार नोंदवून संबंधितांवर फौजदारी गुन्हा दाखल करण्याचे स्पष्ट निर्देश सर्व जिल्ह्यांच्या पोलीस अधीक्षकांना देण्यात आल्याची माहिती मुख्यमंत्री देवेंद्र फडणवीस यांनी मंगळवारी दिली.
मायक्रो फायनान्स कंपन्यांनी सक्तीने किंवा दमदाटी करून कोणतीही वसुली करू नये, यासाठी रिझर्व्ह बँकेला (RBI) अधिकृत पत्र पाठवले जाणार आहे. अशा प्रकारे बळाचा किंवा दमदाटीचा वापर करणाऱ्या कंपन्यांच्या वरिष्ठ अधिकाऱ्यांवर देखील कठोर कारवाई करून गुन्हे दाखल केले जातील, असा सज्जड इशारा मुख्यमंत्र्यांनी दिला आहे. नांदेड येथील घडलेली घटना अत्यंत दुर्दैवी आणि गंभीर स्वरूपाची असून, राज्य मंत्रिमंडळाच्या बैठकीत याची गंभीर दखल घेण्यात आली आहे. कोणत्याही बँकांनी अथवा वित्तीय कंपन्यांनी शेतकऱ्यांकडे अशा प्रकारे तगादा लावून दमदाटी करणे अजिबात खपवून घेतले जाणार नाही, असे मुख्यमंत्री म्हणाले.
मंत्र्यांनी आपापल्या जिल्ह्यांत पाण्याचे योग्य नियोजन करावे
राज्यात सुरू असलेल्या दुष्काळाच्या पार्श्वभूमीवर सर्व मंत्र्यांनी आपापल्या जिल्ह्यांमध्ये पाण्याचे योग्य नियोजन करावे, असे निर्देश राज्य मंत्रिमंडळाच्या बैठकीत देण्यात आले आहेत. जलसंधारणाच्या कामांना प्राधान्य देण्याच्या सूचना मुख्यमंत्र्यांनी यावेळी केल्या असून, यामध्ये प्रामुख्याने छोटे बंधारे बांधणे, तलावांचे रुंदीकरण करणे आणि तलावांमधील गाळ उपसणे यांसारख्या कामांवर विशेष भर देण्यास सांगण्यात आले आहे. रायगड जिल्ह्याच्या धर्तीवर लोकसहभागातून छोटे बंधारे उभारून पाणी अडवणे आणि जमिनीमध्ये पाणी मुरण्याचे प्रमाण वाढवण्यासाठी आवश्यक ते प्रयत्न करण्याच्या सूचनाही बैठकीत देण्यात आल्या आहेत.
