२५ मिनिटांच्या या थ्रीडी शोसाठी पुण्यातील स्टुडिओकडून परवानगी मागितली; नगर परिषदेच्या सर्वसाधारण सभेत मंजुरीसाठी विषय
रत्नागिरी : Ratnagiri Planetarium Moon Mission Show संदर्भात रत्नागिरी नगर परिषदेच्या तारांगणात येत्या काळात प्रेक्षकांसाठी एक अत्यंत रोमांचक आणि माहितीपूर्ण नवीन शो सुरू करण्यात येणार आहे. या नवीन शोच्या माध्यमातून खगोलशास्त्र, अंतराळ संशोधन आणि भारताच्या बहुचर्चित चंद्रमोहिमेविषयी सविस्तर व रोचक माहिती प्रेक्षकांना पाहता व अनुभवता येणार आहे. या विशेष शोचा एकूण कालावधी २५ मिनिटांचा असणार आहे.
रत्नागिरी नगर परिषदेच्या ‘हिंदूहदयसम्राट बाळासाहेब ठाकरे तारांगणात’ नागरिकांसाठी आणि विद्यार्थ्यांसाठी विविध शैक्षणिक व मनोरंजनात्मक कार्यक्रमांचे शो उपलब्ध व्हावेत, यासाठी सध्या प्रशासकीय पातळीवर वेगाने कारवाई सुरू आहे. पुण्यातील ‘वेदार्थ एनिमेशन स्टुडिओ’ने भारताच्या चंद्रमोहिमेवर आधारित हा नवीन शो तारांगणात सुरू करण्यासाठी नगर परिषदेकडे अधिकृत परवानगी मागितली आहे. हा शो स्टिओस्कोपिक थ्रिडी (Stereoscopic 3D) स्वरूपात असणार असून, त्यासाठी आवश्यक असणारा ८ मीटर व्यासाचा भव्य डोम (Dome) तारांगणातील थिएटरमध्ये आधीपासूनच उपलब्ध आहे.
सर्वसाधारण सभेत होणार सविस्तर चर्चा
तारांगणामध्ये हा नवीन शैक्षणिक शो सुरू करण्याच्या दृष्टीने नगर परिषदेने आवश्यक ती प्रशासकीय कार्यवाही सुरू केली आहे. यासंदर्भातील प्रस्तावाला मंजुरी मिळवण्यासाठी आगामी गुरुवारी होणाऱ्या सर्वसाधारण सभेसमोर हा विषय विचारार्थ ठेवण्यात आला आहे. शो सुरू करण्यापूर्वी त्याची तांत्रिक सुसंगतता, आर्थिक तरतूद, अपेक्षित प्रेक्षक संख्या, उत्पन्नाची शक्यता, कराराच्या अटी व शर्ती आणि मुख्य म्हणजे नगर परिषदेच्या हिताच्या संदर्भात सर्वसाधारण सभेत सविस्तर चर्चा केली जाणार आहे.
