वर्ष लोटले तरी कामास सुरुवात नाही; रितसर भाडे भरूनही उन्हाचा त्रास आणि असुविधांचा सामना करण्याची वेळ
*देवरुख *: Devrukh Fish Market Fund Delay संदर्भात देवरुख शहरातील मच्छी मार्केटमधील सोयीसुविधांसाठी तब्बल ४० लाख रुपयांचा निधी मंजूर झाला असला, तरी वर्ष होत आले तरीही प्रत्यक्ष कामाला सुरुवात झालेली नाही, असा संतप्त सवाल येथील गाळेधारक विचारू लागले आहेत.
गाळेधारकांची शेड, मासेविक्रीचा कट्टा व त्यावर पत्रा शेड, पाण्याच्या विहिरीचे बांधकाम, सांडपाणी व्यवस्था यांसारख्या विविध कामांसाठी ४० लाख रुपये मंजूर होऊन आता एक वर्षाचा कालावधी लोटला आहे. यंदाचा पावसाळा पूर्णपणे संपून गेला तरीही या कामाचा अद्याप कोणताही पत्ता नाही, हे काम नेमके का रखडले आहे, याचा शोध गाळेधारकांना लागलेला नाही. याबाबत आता संबंधित विभागाने तातडीने खुलासा करावा, अशी मागणी जोर धरत आहे.
पाण्यामुळे काही गाळ्यांच्या शटरची पूर्णपणे वाट लागली आहे, तर मासे विक्रेत्यांना उन्हाचा तीव्र त्रास सहन करावा लागत आहे. प्रशासनाला नियमानुसार रितसर भाडे भरूनही मूलभूत सुविधांची मोठी वानवा असल्याने गाळेधारक त्रस्त झाले आहेत. परिणामी, सध्या व्यवसाय करत असलेल्या गाळेधारकांना नाहक असुविधांचा सामना करत आपला व्यापार करावा लागत आहे.
