गुडेवठार, अभ्युदयनगर, आरोग्य मंदिर परिसरातील कारवाई; रस्त्यांवरील भंगार वाहने हटवण्याचे प्रशासनाचे आदेश
रत्नागिरी : Ratnagiri Municipal Council Anti Defacement Action संदर्भात रत्नागिरी शहराचे सौंदर्य बिघडवून विद्रुपीकरण करणाऱ्या घटकांवर नगर परिषदेने आता कठोर कारवाईचा बडगा उगारला आहे. शहरात कोणत्याही प्रकारची पूर्वपरवानगी न घेता अनधिकृतपणे लावण्यात आलेले बॅनर्स व फलक काढून जप्त करण्याची मोहीम हाती घेण्यात आली आहे. त्याचबरोबर रस्त्यांच्या कडेला विनाकारण उघड्यावर उभे करून ठेवण्यात आलेल्या आणि रस्ता अडवणाऱ्या नादुरुस्त भंगार गाड्या हटवण्यासाठी वाहन दुरुस्तीचे गॅरेज चालवणाऱ्या संबंधित चालकांना नगर परिषदेकडून नोटिसा बजावण्यात येत आहेत.
शहरात ‘स्मार्टसिटी’ अंतर्गत अनेक नवीन प्रकल्प व सौंदर्यकरणाची कामे विकसित करण्यात आली आहेत. एकीकडे शहराचे सौंदर्य वाढवले जात असतानाच दुसरीकडे शहर विद्रूप करणाऱ्या अनाकलनीय घडामोडींकडेही प्रशासनाने आपले लक्ष केंद्रित केले आहे. या मोहिमेचा पहिला भाग म्हणून रस्त्याच्या कडेला गॅरेजच्या ठिकाणी अनेक महिन्यांपासून पडून असलेली भंगार वाहने लवकरात लवकर हटवावीत, यासाठी गॅरेजचालकांना सक्त ताकीद देण्यात आली आहे.
गुडेवठार, अभ्युदयनगर आणि आरोग्य मंदिर या परिसरातील रस्त्यांवर गेल्या अनेक महिन्यांपासून भंगार वाहने उभी करून ठेवण्यात आली होती. यासंदर्भात वाहतूक पोलीस आणि उपप्रादेशिक परिवहन अधिकाऱ्यांकडेही यापूर्वी तक्रारी करण्यात आल्या होत्या.
५ अनधिकृत फलक जप्त; मालमत्ता विभागाची कारवाई
शहरात कोणत्याही जाहिरातीचे किंवा इतर फलक लावण्यासाठी रत्नागिरी नगर परिषदेची पूर्वपरवानगी घेणे बंधनकारक असते. ही परवानगी न घेता शहरात परस्पर लावण्यात आलेले मोठेमोठे फलक नगर परिषदेच्या पथकाद्वारे काढून जप्त करण्यात येत आहेत. या मोहिमेअंतर्गत मंगळवारी नगर परिषदेच्या मालमत्ता विभागाने दुपारपर्यंत कारवाई करत एकूण ५ अनधिकृत फलक जप्त केले आहेत. यामध्ये मारुती मंदिर आणि कॉलेज रोड परिसरातील रस्त्यांवर विनापरवाना लावण्यात आलेल्या फलकांचा प्रामुख्याने समावेश आहे. प्रशासनाच्या या धडक कारवाईमुळे विनापरवाना फलक लावणारे आणि रस्ते अडवणाऱ्या व्यावसायिकांचे धाबे दणाणले आहेत.
