"कुठे इंद्राचा ऐरावत आणि कुठे…"; सचिन खेडेकरांच्या सूत्रसंचालनाची आठवण काढत पोस्ट व्हायरल
मुंबई:
सोनी मराठी वाहिनीवरील अत्यंत लोकप्रिय ‘कोण होणार करोडपती’ (Kon Honar Crorepati) या ज्ञानरंजन क्विझ शोचे सध्याचे सूत्रसंचालन बॉलिवूडची प्रसिद्ध अभिनेत्री माधुरी दीक्षित करत आहे. या शोमध्ये महाराष्ट्राच्या काрनाकोपऱ्यातून आणि विविध क्षेत्रांतून स्पर्धक हजेरी लावत आहेत. मात्र, या लोकप्रिय कार्यक्रमाच्या सूत्रसंचालनावरून आता सोशल मीडियावर वादाची व चर्चेची ठिणगी पडली आहे. मराठीतील प्रख्यात अभिनेते संजय मोने यांनी माधुरी दीक्षितच्या सूत्रसंचालनावर थेट नाराजी व्यक्त करत एक फेसबुक पोस्ट शेअर केली आहे, जी सध्या प्रचंड व्हायरल होत आहे.
माधुरी दीक्षितच्या सूत्रसंचालनाबाबत भाष्य करताना अभिनेते संजय मोने यांनी आपल्या फेसबुक पोस्टमध्ये लिहिले की, "का कुणास ठाऊक? पण, आज दीक्षित बाईंचा कार्यक्रम बघितला आणि एक जुनी मराठी म्हण आठवली. ती म्हण अशी, ‘कुठे इंद्राचा ऐरावत आणि कुठे शाम भट्टाची तट्टाणी…’ त्यापेक्षा सचिन खेडेकर तोच कार्यक्रम अप्रतिम सादर करायचे." संजय मोने यांच्या या स्पष्ट शब्दांतील पोस्टमुळे सोशल मीडियावर उलट-सुलट चर्चांना उधाण आले असून, नेटकऱ्यांकडून यावर भरभरून प्रतिक्रिया दिल्या जात आहेत.
संजय मोने यांच्या या पोस्टवर अनेकांनी संमती दर्शवली आहे, तर काही नेटकऱ्यांनी इतर पर्यायी नावांची चर्चा केली आहे. एका नेटकऱ्याने, "हिंदीत नाव केलेली कोणी मराठी अभिनेत्री घ्यायचीच होती, तर उर्मिला मातोंडकर जास्त योग्य ठरली असती. मराठी माध्यमातील शिक्षणामुळे तिच्याकडे भाषेची जाण आणि उत्स्फूर्तता अधिक आहे," अशी प्रतिक्रिया दिली. तर अन्य एका युजरने, "केवळ उकडीचे मोदक आणि वरण-भात आवडतो सांगणे म्हणजे मराठी कार्यक्रम निभावून नेण्याचा निकष ठरू शकत नाही," असे म्हटले आहे. याशिवाय, पल्लवी जोशी किंवा रेणुका शहाणे यांची निवड केली असती तर ती अधिक योग्य ठरली असती, असे मतही अनेकांनी मांडले आहे. काहींनी अमिताभ बच्चन यांनी हिंदीत सेट केलेल्या उच्च बेंचमार्कची तुलना करत मराठीत सचिन खेडेकरांचे काम सरस असल्याचे म्हटले आहे.
‘कोण होणार करोडपती’च्या सुरुवातीच्या पर्वांमध्ये अभिनेते सचिन खेडेकर यांनी अत्यंत प्रभावीपणे सूत्रसंचालन करत प्रेक्षकांची मने जिंकली होती. त्यानंतर स्वप्नील जोशी आणि नागराज मंजुळे यांनीही या शोची धुरा सांभाळली होती. आता माधुरी दीक्षित या पर्वाचे सूत्रसंचालन करत असताना, संजय मोने यांच्या या पोस्टने पुन्हा एकदा दर्जेदार सूत्रसंचालन आणि भाषेच्या प्रभावाचा मुद्दा ऐरणीवर आणला आहे.
