दौऱ्यात नदी आणि धरणातील गाळ काढण्यासह ग्रामीण विकासावर मंथन; नाना फाउंडेशनच्या कामाचे अनुभव शेअर
Makarand Anaspure Guhagar दौऱ्यानिमित्त प्रसिद्ध मराठी अभिनेते मकरंद अनासपुरे यांनी आज, गुरुवार, १९ नोव्हेंबर रोजी रत्नागिरी जिल्ह्यातील गुहागर पंचायत समिती कार्यालयाला सदिच्छा भेट दिली. पंचायत समितीच्या सभापती दालनात झालेल्या या भेटीदरम्यान गुहागर तालुक्यातील नदी आणि धरणातील गाळ काढण्याच्या विषयावर सविस्तर चर्चा झाली. पंचायत समितीचे सभापती प्रणव पोळेकर आणि उपसभापती निलेश सुर्वे यांनी पुष्पगुच्छ देऊन त्यांचे स्वागत केले.
या भेटीमध्ये अभिनेते मकरंद अनासपुरे यांनी गुहागर तालुक्यातील ग्रामीण भागात सुरू असलेली विकासकामे तसेच पंचायत समितीच्या माध्यमातून राबवल्या जाणाऱ्या विविध योजनांची माहिती जाणून घेतली. सामाजिक उपक्रमांमध्ये नेहमीच पुढाकार घेणाऱ्या मकरंद अनासपुरे यांच्या आगमनामुळे पंचायत समितीच्या अधिकारी आणि कर्मचाऱ्यांमध्ये उत्साहाचे वातावरण पाहायला मिळाले.
Makarand Anaspure Guhagar: नाना फाउंडेशनचे अनुभव आणि उपस्थितांची साथ
चर्चेदरम्यान मकरंद अनासपुरे यांनी ‘नाना फाउंडेशन’च्या माध्यमातून शेतकऱ्यांसाठी राबवण्यात आलेल्या कामाचे अनुभव उपस्थितांसोबत शेअर केले. जलसंधारण आणि शेतीशी निगडित कामांच्या पार्श्वभूमीवर नदी व धरणातील गाळ काढण्याच्या मुद्द्यावर झालेला हा संवाद महत्त्वपूर्ण मानला जात आहे.

या प्रसंगी नगरसेवक अमरदिप परचुरे, सागर गुजर यांच्यासह पंचायत समितीचे पदाधिकारी आणि कर्मचारी उपस्थित होते. सभापती प्रणव पोळेकर यांनी आपल्या व्यस्त वेळापत्रकातून वेळ काढून गुहागर पंचायत समितीला भेट दिल्याबद्दल अभिनेते मकरंद अनासपुरे यांचे आभार मानले.













