स्थानिक गुन्हे अन्वेषण शाखेची धडक कारवाई! सावर्डे पोलीस ठाणे हद्दीतील घरफोडीचा गुन्हा उघड; पालघर जिल्ह्यातील चार आरोपी ताब्यात, ४ लाख २२ हजार ६०० रुपयांचा मुद्देमाल हस्तगत

स्थानिक गुन्हे अन्वेषण शाखेची धडक कारवाई! सावर्डे पोलीस ठाणे हद्दीतील घरफोडीचा गुन्हा उघड; पालघर जिल्ह्यातील चार आरोपी ताब्यात, ४ लाख २२ हजार ६०० रुपयांचा मुद्देमाल हस्तगत

मुंबई-गोवा महामार्गावर निवळी फाट्याजवळ मध्यरात्री रचला सापळा; मोबाईल टॉवरच्या बॅटऱ्यांसह गुन्ह्यात वापरलेले वाहन जप्त

रत्नागिरी : सावर्डे पोलीस ठाणे हद्दीतील घरफोडी व चोरीच्या गुन्ह्याचा छडा लावण्यात रत्नागिरीच्या स्थानिक गुन्हे अन्वेषण शाखेला (LCB) मोठे यश मिळाले आहे. बुधवारी, १८ नोव्हेंबर २०२६ रोजी मध्यरात्री मुंबई-गोवा महामार्गावरील निवळी फाट्याच्या पुढे असलेल्या ‘ग्रीन पार्क फॅमिली रेस्टॉरंट’समोर सापळा रचून पथकाने पालघर जिल्ह्यातील चार सराईत आरोपींना ताब्यात घेतले आहे. या आरोपींकडून चोरीस गेलेल्या मोबाईल टॉवरच्या बॅटऱ्या आणि गुन्ह्यात वापरलेले वाहन असा एकूण ४ लाख २२ हजार ६०० रुपयांचा मुद्देमाल हस्तगत करण्यात आला आहे.

अशी झाली मध्यरात्रीची धडक कारवाई :

पोलिसांकडून मिळालेल्या माहितीनुसार, सावर्डे पोलीस ठाण्यात गुन्हा रजिस्टर क्रमांक १५२/२०२६ नुसार भारतीय न्याय संहिता २०२३ कलम ३३१(४) आणि ३०५(अ) अन्वये घरफोडी व चोरीचा गुन्हा दाखल होता. या गुन्ह्यातील संशयित वाहन आणि आरोपींचा शोध घेण्यासाठी स्थानिक गुन्हे अन्वेषण शाखेचे पथक शासकीय वाहनाने रत्नागिरी ते चिपळूण विभागात पेट्रोलिंग करत होते.

Arihant 3

दिनांक १८ नोव्हेंबर २०२६ रोजी मध्यरात्री १२.१५ वाजण्याच्या सुमारास मुंबई-गोवा महामार्गावरील निवळी फाट्याच्या पुढे असलेल्या ‘ग्रीन पार्क फॅमिली रेस्टॉरंट’समोर हे संशयित वाहन उभे असल्याचे पथकाच्या निदर्शनास आले. पथकाने तात्काळ पंचांसमक्ष सदर वाहनाची तपासणी केली असता त्यामध्ये पालघर जिल्ह्यातील चार इसम आढळून आले. कसून चौकशी केली असता त्यांनी सावर्डे हद्दीतील गुन्हा केल्याची कबुली दिली.

ताब्यात घेण्यात आलेले चारही आरोपी पालघर जिल्ह्यातील :

या कारवाईत पोलिसांनी खालील चार आरोपींना ताब्यात घेतले आहे:

जयप्रकाश एकनाथ चिंदरकर (वय ३२ वर्षे) : रा. विरार पूर्व, गणपती मंदिर शेजारी, जि. पालघर.

नवनाथ भगवान उतेकर (वय ३६ वर्षे) : रा. साईनाथ, साई सावली अपार्टमेंट, विरार पूर्व, जि. पालघर.

कौशिक प्रभाकर जाधव (वय २७ वर्षे) : रा. येसूबाई कंपाऊंड, सिद्धिविनायक बी विंग, विरार, जि. पालघर.

मंगेश मनोज गुरव (वय २० वर्षे) : रा. मोरेगाव तलाव, नालासोपारा, जि. पालघर.

४ लाख २२ हजार ६०० रुपयांचा मुद्देमाल हस्तगत :

पोलिसांनी आरोपींकडून चोरीस गेलेल्या मोबाईल टॉवरच्या एकूण तीन बॅटऱ्या (किंमत रु. २२,५००/-), गुन्हा करण्यासाठी वापरलेले साहित्य आणि गुन्ह्यात वापरलेले संशयित वाहन असा सर्व मिळून एकूण ४,२२,६०० रुपये किमतीचा मुद्देमाल जप्त केला आहे. चारही आरोपींना व जप्त केलेल्या मुद्देमालाला पुढील तपास व कायदेशीर कारवाईसाठी सावर्डे पोलीस ठाण्यात हजर करण्यात आले आहे.

या पथकाने पार पाडली कारवाई :

ही यशस्वी कारवाई रत्नागिरीचे प्रभारी पोलीस अधीक्षक श्री. बी. बी. महामुनी यांच्या मार्गदर्शनाखाली स्थानिक गुन्हे अन्वेषण शाखेचे पोलीस निरीक्षक श्री. नितीन ढेरे यांच्या नेतृत्वाखालील पथकाने केली. या कारवाईत पोलीस हवालदार विजय आंबेकर, वैभव मोरे, गणेश सावंत आणि चालक पोलीस हवालदार अतुल कांबळे यांनी महत्त्वाची भूमिका बजावली.