रत्नागिरी, 28 एप्रिल 2025: महर्षी कर्वे महिला महाविद्यालय, रत्नागिरी आणि जिल्हा शिक्षण व प्रशिक्षण संस्था (DITE), रत्नागिरी यांच्या संयुक्त विद्यमाने प्राचार्यांसाठी आर्टिफिशियल इंटेलिजन्स (AI) टूल्स या विषयावर एक दिवसीय कार्यशाळा हॉटेल विवा एक्झिक्यूटिव्ह, मारुती मंदिर येथे यशस्वीपणे संपन्न झाली. या कार्यशाळेत रत्नागिरीतील विविध हायस्कूल आणि ज्युनिअर कॉलेजच्या प्राचार्यांनी उत्स्फूर्त सहभाग नोंदवला.
कार्यक्रमाच्या सुरुवातीला उपस्थित सर्वांनी काश्मीरमधील पहलगाम येथे दहशतवादी हल्ल्यात मृत्यूमुखी पडलेल्या देशबांधवांना एक मिनिट मौन पाळून श्रद्धांजली अर्पित केली. यानंतर आश्रमगीत, दीपप्रज्वलन आणि भारतरत्न महर्षी कर्वे तसेच बाया कर्वे यांच्या प्रतिमेचे पूजन करून कार्यशाळेची औपचारिक सुरुवात झाली.
कार्यशाळेचे प्रमुख वक्ते डॉ. आशिष तेंडुलकर, जे गुगल इंडिया येथे AI आणि मशीन लर्निंग लीडर म्हणून कार्यरत आहेत, यांनी उपस्थितांना मार्गदर्शन केले. गेल्या 25 वर्षांपासून AI आणि मशीन लर्निंग क्षेत्रात कार्यरत असलेल्या डॉ. तेंडुलकर यांनी शैक्षणिक प्रशासन, अध्यापन आणि नियोजनात AI च्या वाढत्या उपयोगाबाबत सविस्तर माहिती दिली. त्यांनी ChatGPT, Gemini, Notebook LM यांसारख्या AI टूल्सचा वापर करून प्रेझेंटेशन, एक्सेल शीट तयार करण्याचे प्रात्यक्षिक सादर केले.
डॉ. तेंडुलकर म्हणाले: “AI ही केवळ तंत्रज्ञानाची प्रगती नाही, तर ती शैक्षणिक क्षेत्रात कार्यक्षमता आणि सर्जनशीलता वाढवण्याचे साधन आहे. प्राचार्यांनी याचा स्वीकार करून शिक्षक आणि विद्यार्थ्यांना मार्गदर्शन करावे.”
या कार्यशाळेचा मुख्य उद्देश खालीलप्रमाणे होता:
AI बद्दल जागरूकता निर्माण करणे.
शाळेच्या प्रशासन आणि अध्यापन प्रक्रियेत AI चा सकारात्मक वापर कसा करता येईल याचे मार्गदर्शन करणे.
विद्यार्थ्यांचे मूल्यांकन, अहवाल लेखन यांसारख्या कामांमध्ये AI टूल्सचा वापर करून कार्यक्षमता वाढवणे.
बदलत्या शैक्षणिक तंत्रज्ञानाशी जुळवून घेण्यासाठी प्राचार्यांना प्रोत्साहन देणे आणि त्यांना इतर शिक्षकांना मार्गदर्शन करण्यास प्रवृत्त करणे.
कार्यशाळेत खालील मान्यवर उपस्थित होते:
डॉ. राजीव सप्रे, माजी विभाग प्रमुख, गणित विभाग, गोगटे जोगळेकर कॉलेज
अनुपमा तावशीकर, सीनियर लेक्चरर, क्लास वन ऑफिसर, DITE रत्नागिरी
मंदार सावंतदेसाई, प्रकल्प प्रमुख, महर्षी कर्वे संस्था
स्वप्निल सावंत, प्रकल्प समन्वयक
स्नेहा कोतवडेकर, प्र. प्राचार्या, महर्षी कर्वे महिला महाविद्यालय
अनुपमा तावशीकर यांनी सांगितले, “AI चा प्रभाव वाढत असताना, आपणही आपल्या दैनंदिन जीवनात आणि शैक्षणिक प्रक्रियेत AI चा सपोर्ट सिस्टीम म्हणून वापर केला पाहिजे.” तर, कार्यक्रमाचे अध्यक्ष डॉ. राजीव सप्रे यांनी शिक्षणाला वयाची मर्यादा नसावी आणि प्राचार्यांनी सतत नवीन तंत्रज्ञान शिकत राहावे, असे आवाहन केले.
कार्यक्रमाचे सूत्रसंचालन आणि समारोप
कार्यक्रमाचे सूत्रसंचालन असिस्टंट प्रोफेसर केतन पाथरे यांनी केले, तर आभार प्रदर्शन असिस्टंट प्रोफेसर श्रुती यादव यांनी केले. कार्यक्रमाची सांगता कु. वेदश्री सरदेसाई यांनी सादर केलेल्या पसायदानाने झाली.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:46 AM 28/Apr/2025
