रत्नागिरी, दि. ०४ जून २०२५ : रत्नागिरी तालुक्यातील मिरजोळे, पाटीलवाडी येथील नदी किनारी असलेल्या जंगलमय भागात सुरू असलेल्या एका गावठी हातभट्टीवर रत्नागिरी शहर पोलिसांनी छापा टाकला आहे. या कारवाईत पोलिसांनी ४२ हजार ८५० रुपये किमतीचा मुद्देमाल जप्त करण्यात आला आहे. ही कारवाई ३ जून २०२५ रोजी सकाळी ७:३५ वाजता करण्यात आली.
काय आहे प्रकरण?
रत्नागिरी शहर पोलीस ठाण्याचे पोलीस हवालदार उमेश कृष्णा पवार (पोहेकॉ/१३७२) यांना मिळालेल्या गोपनीय माहितीनुसार, मिरजोळे, पाटीलवाडी येथील नदी किनारी असलेल्या जंगलमय भागात अवैध गावठी हातभट्टीची दारू तयार केली जात होती. या माहितीच्या आधारे पोलिसांनी ३ जून रोजी सकाळी ७:३५ वाजता या ठिकाणी छापा टाकला.
छाप्यादरम्यान, पोलिसांनी महेश मधकर पाटील (वय ५०, रा. परटवणे, सध्या मिरजोळे पाटीलवाडी, ता.जि. रत्नागिरी) याला ताब्यात घेतले. त्याच्या ताब्यातून पोलिसांनी गावठी हातभट्टीची दारू बनवण्यासाठी लागणारे साहित्य आणि तयार दारू असा एकूण ४२ हजार ८५० रुपयांचा मुद्देमाल जप्त केला.
जप्त केलेला मुद्देमाल:
९४० लिटर गूळ-नवसागर मिश्रित कुजके रसायन: अंदाजे किंमत ३४,३०० रुपये.
८० लिटर गावठी हातभट्टीची दारू (कॅनसह): अंदाजे किंमत ८,२०० रुपये.
०१ गोलाकार अॅल्युमिनियमची डेग: दारू गाळण्यासाठी वापरली जाणारी, किंमत ३०० रुपये.
०१ लाकडी आयताकृती चाटू (स्टीलची नळी आणि प्लास्टिक तोटीसह): किंमत ५० रुपये.
गुन्हा दाखल, पुढील तपास सुरू
या प्रकरणी पोलीस हवालदार उमेश कृष्णा पवार यांच्या फिर्यादीनुसार, महेश मधकर पाटील याच्या विरोधात रत्नागिरी शहर पोलीस ठाण्यात महाराष्ट्र दारूबंदी कायदा कलम ६५ (ब), (क), (ड), (फ), (ई) प्रमाणे गुन्हा दाखल करण्यात आला आहे. त्याला अटक करण्यात आली असून, या प्रकरणाचा पुढील तपास रत्नागिरी शहर पोलीस करत आहेत. रत्नागिरी परिसरातून अवैध दारू धंद्यांचे समूळ उच्चाटन करण्यासाठी पोलिसांकडून अशा कारवाया सुरूच राहतील, असे पोलिसांनी सांगितले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:43 04-06-2025
