लांजा : मुंबई-गोवा राष्ट्रीय महामार्गाचे लांजा शहरामध्ये काम सुरू आहे. या कामांमध्ये अडथळा येऊ नये म्हणून, रस्त्यावरील छोटे-मोठे व्यवसाय करणाऱ्या खोकेधारकांना अनधिकृत ठरवण्यात आले आहे. ३ जुलैपर्यंत व्यवसाय बंद न केल्यास अथवा खोके न हटविल्यास त्यांच्यावर पोलिसांच्या साह्याने दंडात्मक कारवाई करण्यात येईल, अशा नोटिसा नगरपंचायत व तहसील कार्यालयांनी दिल्या आहेत.
शहरातील हे खोकेधारक अन्य कोणत्याही राज्य अथवा जिल्ह्यांतून आलेले नसून स्थानिक आहेत. त्याचबरोबर गेले अनेक वर्षे ते छोटा-मोठा व्यवसाय करून कुटुंबाचा उदरनिर्वाह चालवित आहेत. महामार्गाच्या कामामुळे त्यांचा व्यवसाय अस्थिर झाला आहे. या परिस्थितीत प्रशासनाने त्यांच्यावर कारवाईचा बडगा उगारल्यामुळे खोकेधारकांमध्ये तीव्र नाराजी आहे. शहरात ३०० खोकेधारक असून, उदरनिर्वाहासाठी वडापाव, चहा, कपडे विक्री, भाजीपाला असे व्यवसाय करीत आहेत. त्यांना आता आपला व्यवसाय बंद करावा लागणार आहे. त्यांच्यावर बेकारीची वेळ येणार आहे.
या नोटिशीमुळे भयभीत झालेल्या शहरातील व्यावसायिकांनी तालुकाप्रमुख सुरेश करंबळे यांची भेट घेऊन आपल्यावर होत असलेल्या अन्यायाबाबत सहकार्य करण्याची विनंती केली. शिवसेनेने शहरातील खोकेधारकांच्या पाठीशी ठामपणे उभे राहण्याचा निर्धार केला आहे. प्रशासनाने किंवा नगरपंचायतीने कारवाईची नोटीस देताना पर्यायी जागा उपलब्ध करून देणे अपेक्षित होते. मात्र, अशी कोणतीही भूमिका नगरपंचायतीने घेतलेली नाही. सध्या पावसाचे दिवस आहेत, अवघ्या एक ते दीड महिन्यानंतर गणपती सण येत आहे. अशावेळी त्या व्यावसायिकांनी काय करायचे, असा प्रश्न करंबळे यांनी उपस्थित केला.
ज्येष्ठ शिवसैनिक नितीन शेट्ये म्हणाले, शहरातील महामार्गालगत अनेकव्यावसायिकांनी काय करायचे, असा प्रश्न करंबळे यांनी उपस्थित केला. ज्येष्ठ शिवसैनिक नितीन शेट्ये म्हणाले, शहरातील महामार्गालगत अनेक अनधिकृत बांधकामे उभी आहेत, तसेच अनेक इमारतीही उभ्या राहत आहेत, मात्र, धनदांडग्यावर कारवाई करण्याची हिंमत प्रशासन करीत नाही. हातावर पोट असलेल्या सर्वसामान्यांवर कारवाई करीत आहे. सर्व खोकेधारकांच्या पाठीशी शिवसेना ठामपणे उभी आहे.
नगरपंचायत प्रशासन व लांजा तहसीलदार हे कोणाच्या तरी दबावाला बळी पडून ही कारवाई करीत आहेत. मात्र, त्यामुळे सर्वसामान्य व्यावसायिकांचे संसार उघड्यावर पडणार असेल तर शिवसेना सहन करणार नाही- अभिजित राजेशशिर्के, तालुका युवा अधिकारी, युवासेना
गेली अनेक वर्षे लांजा शहरात छोटा-मोठा व्यवसाय करून उदरनिर्वाह करणाऱ्या खोकेधारकांना अनधिकृत ठरवून प्रशासन त्यांच्यावर कारवाई करणार असेल तर शिवसेना (उद्धव बाळासाहेब ठाकरे) हे कदापि सहन करणार नाही. शासनाच्या या भूमिकेचा तीव्र निषेध करीत असून वेळप्रसंगी तीव्र आंदोलन करू- सुरेश करंबळे तालुकाप्रमुख, शिवसेना
लांजा बाजारपेठेतील खोकेधारकांना प्रशासनाने ३ जुलैपर्यंत खोके उचलण्याचे आदेश दिले आहेत. वर्षानुवर्षे हे खोकेधारक या ठिकाणी व्यवसाय करीत असून, या व्यावसायिकांना न्याय देण्यासाठी राजकीय पक्षांनी पुढाकार घ्यावा-नितीन शेटे, व्यावसायिक, लांजा
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:41 AM 02/Jul/2025
