रत्नागिरी: रत्नागिरी तालुक्यातील देवूड कसबेवाडी परिसरात एका किराणा दुकानासमोर अघोरी विधी करून दहशत माजवण्याचा धक्कादायक प्रकार उघडकीस आला आहे. दुकानासमोर लिंबू, नारळ आणि प्राण्याची कवटी ठेवून तांत्रिक पूजा केल्याने परिसरात भीतीचे वातावरण पसरले आहे. याप्रकरणी रत्नागिरी पोलिसांनी अज्ञात व्यक्तीविरोधात जादूटोणा प्रतिबंधक कायद्यांतर्गत गुन्हा दाखल केला आहे.
नेमकी घटना काय?
फिर्यादी सुनील शांताराम गोताड (वय ४६, रा. देवूड कसबेवाडी) यांचे गावात ‘मे. लक्ष्मी स्टोअर्स’ नावाचे किराणा मालाचे दुकान आहे. ही घटना २७ मार्च रोजी रात्री ८ वाजेपासून ते २८ मार्च रोजी सायंकाळी ५ वाजेच्या दरम्यान घडली. सुनील गोताड जेव्हा आपल्या दुकानासमोर गेले, तेव्हा त्यांना एका काजूच्या झाडाखाली अघोरी पूजा मांडलेली दिसली, ज्यामुळे त्यांना मोठा धक्का बसला.
प्राण्याची कवटी अन् तांत्रिक पूजा
अज्ञात इसमाने गोताड आणि त्यांच्या कुटुंबाचे अनिष्ट व्हावे, या हेतूने दुकानासमोर अघोरी मांड मांडली होती.
- पूजेचे साहित्य: केळीच्या पानावर एक लिंबू, एक नारळ आणि एका प्राण्याची जुनाट लहान आकाराची कवटी ठेवून तांत्रिक विधी करण्यात आला होता.
- दहशतीचे वातावरण: या प्रकारामुळे गोताड कुटुंब प्रचंड घाबरले असून, गावातही या अघोरी कृत्याची चर्चा सुरू झाली आहे. कोणाच्या तरी सांगण्यावरून किंवा जुन्या वादातून हा प्रकार घडला असावा, असा संशय व्यक्त केला जात आहे.
जादूटोणा प्रतिबंधक कायद्यानुसार गुन्हा दाखल
अंधश्रद्धेला खतपाणी घालणाऱ्या या कृत्याची रत्नागिरी पोलिसांनी गंभीर दखल घेतली आहे. सुनील गोताड यांच्या तक्रारीवरून पोलिसांनी अज्ञात आरोपीविरोधात ‘महाराष्ट्र नरबळी आणि इतर अमानुष, अनिष्ट व अघोरी प्रथा व जादूटोणा प्रतिबंध अधिनियम २०१३’ च्या कलम ३ (२) नुसार गुन्हा नोंदवला आहे.
२९ मार्च रोजी पहाटे २ वाजता हा गुन्हा अधिकृतपणे दाखल करण्यात आला असून, पोलीस आता या अघोरी कृत्यामागील सूत्रधाराचा शोध घेत आहेत.
पोलिसांचे आवाहन
अशा प्रकारच्या अघोरी प्रथांना बळी पडू नका आणि समाजात भीती पसरवणाऱ्या कोणत्याही कृत्याची माहिती मिळाल्यास तातडीने पोलिसांशी संपर्क साधावा, असे आवाहन प्रशासनातर्फे करण्यात आले आहे. सुशिक्षित रत्नागिरी जिल्ह्यात अशा प्रकारच्या घटना घडणे हे चिंतेचे विषय असल्याचे बोलले जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:25 31-03-2026
