मोरवंडे-बोरज येथील सुरभी हॉटेलसमोरील घटना; भटक्या जनावरामुळे चालकाचे नियंत्रण सुटल्याने अपघात
खेड (प्रतिनिधी): ‘Mumbai Goa Highway Accident’ म्हणजेच मुंबई-गोवा महामार्गावरील खेड तालुक्यातील मोरवंडे-बोरज येथे रविवारी रात्री एक भीषण अपघाताची घटना घडली आहे. गणपतीपुळे येथून दर्शन घेऊन ठाण्याकडे परतणाऱ्या भाविकांची अल्टो कार रस्त्यावरून थेट २० ते २५ फूट खोल दरीत कोसळली. या अपघातात कारमधील एकाच कुटुंबातील पाच प्रवासी गंभीर जखमी झाले असून, सुदैवाने सर्व प्रवासी सुखरूप बचावले आहेत. जखमींना तातडीने उपचारासाठी रुग्णालयात दाखल करण्यात आले आहे.
मिळालेल्या प्राथमिक माहितीनुसार, अल्टो कार (क्रमांक एमएच ०४ केडी ६१२८) ही रविवारी रात्री रत्नागिरी जिल्ह्यातील प्रसिद्ध तीर्थक्षेत्र गणपतीपुळे येथून दर्शन आटोपून मुंबई-ठाणेच्या दिशेने प्रवासाला निघाली होती. रात्री सुमारे ९.४५ वाजण्याच्या सुमारास ही कार खेड तालुक्यातील मोरवंडे-बोरज येथील सुरभी हॉटेलच्या समोर आली असता हा अपघात घडला.
घटनास्थळावरील काही प्रत्यक्षदर्शींनी दिलेल्या माहितीनुसार, महामार्गावर प्रवास करत असताना कारसमोर अचानक एक गाय आडवी आली. या भटक्या जनावराला वाचवण्याच्या प्रयत्नात चालकाचे वाहनावरील नियंत्रण सुटले. परिणामी, कार रस्त्याच्या कडेला जाऊन थेट २५ फूट खोल दरीत कोसळली. दरीत कोसळल्यामुळे या चारचाकी वाहनाचे मोठ्या प्रमाणावर नुकसान झाले आहे. अपघात घडताच आजूबाजूच्या स्थानिक नागरिकांनी तातडीने घटनास्थळी धाव घेत बचावकार्य सुरू केले.
या अपघाताची माहिती मिळताच महामार्गावरील भरणे नाका ब्रिजखाली तैनात असलेली ‘जगद्गुरू रामानंदाचार्य श्री नरेंद्राचार्यजी महाराज संस्थान, नाणीजधाम’ यांची २४ तास विनामूल्य अपघात मदत सेवा देणारी रुग्णवाहिका तत्काळ घटनास्थळी दाखल झाली. रुग्णवाहिकेचे चालक सुरज हंबीर यांनी कमालीची तत्परता दाखवत स्थानिक नागरिकांच्या मदतीने दरीतील कारमधून जखमींना सुरक्षितपणे बाहेर काढले. त्यानंतर सर्व जखमींना तातडीने उपचारासाठी भरणे येथील धन्वंतरी रुग्णालयात हलवण्यात आले.
या भीषण अपघातात सिद्धी नाईक (वय २९), रिद्धी नाईक (वय २९), स्नेहल नाईक (वय ५८), सिद्धेश नाईक (वय ६५) आणि तेजस बोरकर (वय ३१) हे पाच जण जखमी झाले आहेत. हे सर्व जखमी प्रवासी ठाणे येथील रहिवासी असून सध्या त्यांच्यावर धन्वंतरी रुग्णालयात उपचार सुरू आहेत. सुदैवाने या मोठ्या अपघातात कोणतीही जीवितहानी झालेली नाही. मात्र, रात्रीच्या वेळी मुंबई-गोवा महामार्गावर भटक्या जनावरांचा वावर मोठ्या प्रमाणात वाढल्याने अपघातांची मालिका सुरूच असून, यावर प्रशासनाने ठोस उपाययोजना करावी अशी मागणी आता प्रवाशांमधून केली जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
08:27 08-06-2026
