देवस्थान समितीकडून दर्शन व्यवस्था सुरळीत
गणपतीपुळे: गणपतीपुळेत पर्यटकांची विक्रमी गर्दी पाहायला मिळाली असून, यंदाचा उन्हाळी पर्यटन हंगाम स्थानिक अर्थव्यवस्थेसाठी अत्यंत फायदेशीर ठरला आहे. कोकणातील जागतिक दर्जाचे पर्यटन स्थळ आणि लाखो भाविकांचे श्रद्धास्थान असलेल्या या क्षेत्रात एप्रिल आणि मे महिन्यांदरम्यान लाखो भाविक व पर्यटकांनी हजेरी लावल्याची अधिकृत माहिती गणपतीपुळे देवस्थान कार्यालयाकडून देण्यात आली आहे. जून महिन्याच्या पहिल्या आठवड्यातही ही गर्दी कायम असून, अथांग समुद्रकिनारा आणि स्वयंभू श्री गणेशाचे दर्शन घेण्यासाठी देश-विदेशातून पर्यटक मोठ्या संख्येने दाखल होत आहेत.
विविध राज्यांसह विदेशी पर्यटकांची वाढती पसंती
यंदाच्या पर्यटन हंगामात महाराष्ट्राच्या कानाकोपऱ्यासह गुजरात, कर्नाटक, गोवा तसेच उत्तर भारतातील विविध राज्यांतून हजारो पर्यटकांनी गणपतीपुळेला पसंती दिली आहे. याशिवाय अनेक विदेशी पर्यटकांनीही येथे भेट देऊन येथील निसर्गसौंदर्याचा आनंद घेतला. विशेषतः शनिवार आणि रविवारी वीकेंडला या ठिकाणी दररोज ३५ ते ४० हजारांपर्यंत भाविकांची उपस्थिती नोंदवली गेली. या प्रचंड संख्येमुळे परिसरातील हॉटेल्स, भोजनालये, पार्किंग आणि वाहतूक व्यवस्था पूर्णपणे गजबजून गेली होती.
देवस्थान समितीचे चोख नियोजन आणि लाडू प्रसाद पुन्हा सुरू
भाविकांची वाढती गर्दी लक्षात घेऊन गणपतीपुळे देवस्थान समितीकडून विशेष आणि चोख नियोजन करण्यात आले होते. दर्शनासाठी स्वतंत्र रांगा, पिण्याच्या पाण्याची सोय, कडक सुरक्षा आणि स्वच्छता यावर विशेष भर देण्यात आल्यामुळे गर्दी असूनही दर्शन व्यवस्था सुरळीत राहिली. विशेष म्हणजे, मार्च महिन्यात बंद करण्यात आलेला भाविकांचा आवडता ‘लाडू प्रसाद’ देवस्थानने पुन्हा सुरू केला आहे. सध्या दुपारच्या सत्रात सुमारे २ हजार भाविक खिचडी प्रसादाचा लाभ घेत आहेत, तर सायंकाळच्या सत्रात १२०० ते १३०० भाविक महाप्रसादाचा लाभ घेत आहेत.
हॉटेल, होमस्टे आणि स्थानिक व्यावसायिकांना मोठा आर्थिक आधार
या विक्रमी गर्दीमुळे गणपतीपुळे आणि आसपासच्या परिसरातील हॉटेल व्यवसाय, रिसॉर्टस्, होमस्टे, खानावळी आणि वाहन व्यावसायिकांना मोठा आर्थिक आधार मिळाला आहे. गेल्या काही वर्षांतील मंदीनंतर यंदाचा हंगाम अभूतपूर्व तेजीत आला असून, बहुतांश लॉजेसचे आगाऊ बुकिंग पूर्ण झाले होते. धार्मिक पर्यटनासोबतच समुद्रकिनाऱ्यावरील बोटिंग, स्थानिक खाद्यपदार्थ आणि कोकणी उत्पादनांच्या विक्रीतून कोट्यवधी रुपयांची उलाढाल झाली असून, स्थानिक रोजगाराला यामुळे मोठी गती मिळाली आहे. शाळा-कॉलेजांच्या सुट्ट्या संपत आल्या तरी जूनच्या मध्यापर्यंत ही गर्दी अशीच कायम राहण्याची शक्यता आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:38 12-06-2026
