सोहा अली खानच्या पॉडकास्टमध्ये दिया मिर्झाचे पर्यावरण आणि पुरुषी मानसिकतेवर वादग्रस्त वक्तव्य
मुंबई: बॉलीवूडमधील प्रसिद्ध अभिनेत्री दिया मिर्झा तिच्या चित्रपटांइतकीच विविध सामाजिक विषयांवरील तिच्या रोखठोक आणि बिनधास्त मतांसाठी ओळखली जाते. मात्र, नुकतंच एका पॉडकास्टमध्ये पर्यावरणावर भाष्य करताना दियाने थेट पुरुषांना आणि पितृसत्तेला जागतिक हवामान बदलासाठी जबाबदार धरले आहे. तिच्या या वक्तव्याचा व्हिडिओ समोर आल्यानंतर सोशल मीडियावर नवीन वादाला तोंड फुटले असून अभिनेत्री सध्या नेटकऱ्यांच्या तीव्र टीकेची धनी ठरली आहे.
‘ऑल अबाऊट हर’ पॉडकास्टमध्ये मांडले मत; पुरुषी अहंकारावर ओढले ताशेरे
दिया मिर्झाने अभिनेत्री सोहा अली खानच्या ‘ऑल अबाऊट हर’ (All About Her) या नव्या पॉडकास्टमध्ये हजेरी लावली होती. या दरम्यान तिने हवामान बदल, पर्यावरणाचा वाढता ऱ्हास आणि मानवाचे निसर्गाशी असलेले नाते यावर सविस्तर भाष्य केले. आपला मुद्दा मांडताना दिया मिर्झा म्हणाली, “पितृसत्ता (Patriarchy) हेच जगातील हवामान बदलाचे मुख्य कारण असून या जगातील पुरुषच त्यासाठी पूर्णपणे जबाबदार आहेत”.
सोहा अली खानचा प्रश्न आणि दियाचा दावा
दियाचे हे धक्कादायक वक्तव्य ऐकून अभिनेत्री सोहा अली खानने तिला मध्येच थांबवत विचारले, “तुम्ही पुरुषी अहंकाराबद्दल बोलत आहात का?” यावर दियाने तात्काळ होकार दिला. ती पुढे म्हणाली, “होय, पुरुषांनीच हवामान बदलाला खतपाणी घातले आहे. आज जगातील अशांतता आणि लोकांना सहन कराव्या लागत असलेल्या त्रासासाठी पुरुषी मानसिकता जबाबदार आहे. हे संकट फक्त ग्लोबल साउथपुरते मर्यादित नसून, आता ग्लोबल नॉर्थमध्येही याचे चटके बसत आहेत.” निसर्गाचे शोषण हे वर्चस्व आणि आक्रमक विकासाला महत्त्व देणाऱ्या पुरुषी मानसिकतेतून येते, असा दावा तिने केला.
“उच्चभ्रू सेलिब्रिटींचा ढोंगीपणा”; नेटकऱ्यांनी उठवली टीकेची झोड
दिया मिर्झाचा हा व्हिडिओ सोशल मीडियावर वाऱ्यासारखा पसरल्यानंतर नेटकऱ्यांनी तिच्यावर जोरदार टीका करण्यास सुरुवात केली आहे. अनेकांनी दियाच्या या विधानाला ‘उच्चभ्रू सेलिब्रिटींचा ढोंगीपणा’ असे म्हटले आहे. स्वतः आलिशान गाड्यांमधून फिरणारे, विमानाने वारंवार प्रवास करणारे आणि चोवीस तास वातानुकूलित (AC) रूममध्ये राहणारे श्रीमंत सेलिब्रिटी निसर्गाला जास्त हानी पोहोचवतात आणि मोठा कार्बन फूटप्रिंट तयार करतात, असे मुद्दे युजर्सनी उपस्थित केले आहेत. स्वतःची जीवनशैली न बदलता केवळ पुरुषांना दोष देणे चुकीचे असून, सामान्य लोकांना पर्यावरण संरक्षणाचा उपदेश देण्याचा अधिकार या सेलिब्रिटींना कोणी दिला, असा थेट प्रश्न आता नेटकरी विचारत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:33 16-06-2026
