मान्सूनने दडी मारल्याने दमटपणात मोठी वाढ
रत्नागिरी: रत्नागिरी जिल्ह्यात मान्सूनचे आगमन झाले असले तरी गेल्या ६ ते ७ दिवसांपासून पावसाने अचानक दडी मारल्यामुळे संपूर्ण जिल्हा सध्या पावसाच्या तीव्र प्रतीक्षेत आहे. पाऊस गायब झाल्याने रत्नागिरीत उष्णता आणि हवेतील दमटपणात प्रचंड वाढ झाली असून, यामुळे नागरिकांची कमालीची कोंडी झाली आहे. मान्सूनची प्रगती संथ गतीने सुरू असल्यामुळे आणि पावसाने हुलकावणी दिल्यामुळे जिल्ह्यातील शेतीची कामे खोळंबली असून, पावासाअभावी खरीप हंगामातील मुख्य पेरण्या पूर्णपणे रखडल्याने बळीराजा चिंतेत पडला आहे.
कमाल तापमान ३३ अंश सेल्सिअसवर; आर्द्रतेमुळे प्रत्यक्ष तापमानापेक्षा अधिक उकाडा
सोमवारी रत्नागिरीचे कमाल तापमान सुमारे ३२ ते ३३ अंश सेल्सिअसच्या आसपास नोंदवले गेले. मात्र, हवेतील आर्द्रतेचे (ह्युमिडिटी) प्रमाण ७० टक्क्यांहून अधिक असल्याने नागरिकांना प्रत्यक्ष तापमानापेक्षा कितीतरी पटीने जास्त उकाडा जाणवत आहे. या असह्य उष्णतेमुळे नागरिक अक्षरशः घामाघूम होत आहेत. विशेषतः दुपारच्या वेळी उन्हाची आणि उष्म्याची तीव्रता इतकी वाढते की, बाजारातील रस्ते ओस पडत असल्याचे चित्र आहे.
सावलीचा आधार आणि समुद्रकिनारी भागात अस्वस्थता
उकाड्याची तीव्रता वाढल्यामुळे रत्नागिरीतील मुख्य बाजारपेठा, शासकीय कार्यालये तसेच विविध सार्वजनिक ठिकाणी येणारे नागरिक उन्हापासून व उकाड्यापासून स्वतःचा बचाव करण्यासाठी झाडांच्या किंवा शेडच्या सावलीचा आधार घेताना दिसत आहेत. रत्नागिरी हा किनारपट्टीचा जिल्हा असल्याने समुद्रकिनारी भागात दमट हवेचे प्रमाण प्रचंड वाढले आहे, ज्यामुळे स्थानिक नागरिक आणि पर्यटकांमध्ये अस्वस्थता अधिक जाणवत आहे.
पहिल्या पंधरवड्यात ६९ टक्के पावसाची तूट; संथ गतीने प्रगती
भारतीय हवामान विभागाने दिलेल्या माहितीनुसार, जून महिन्याच्या पहिल्या पंधरवड्यात संपूर्ण राज्यात सरासरीपेक्षा तब्बल ६९ टक्के कमी पावसाची नोंद झाली आहे. नैऋत्य मोसमी वाऱ्यांची म्हणजेच मान्सूनची प्रगती सध्या अत्यंत संथ गतीने सुरू असल्यामुळे ही स्थिती निर्माण झाली असल्याचे हवामान खात्याने स्पष्ट केले आहे. जिल्ह्यात कधी एकदा मुसळधार पाऊस सुरू होतो आणि या तीव्र उकाड्यापासून दिलासा मिळतो, याकडे आता सर्व रत्नागिरीकरांचे डोळे लागले आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:55 16-06-2026
