रत्नागिरी: भाजप प्रवेश करू इच्छिणारे माजी आमदार बाळ माने यांच्या राजकीय वाटचालीला मोठा धक्का बसला आहे. महाविकास आघाडीला चांगले दिवस आले आहेत असे समजून आपली विचारधारा सोडणाऱ्यांना पक्षात पुन्हा स्थान मिळणार नाही, असे स्पष्ट संकेत भारतीय जनता पार्टीचे प्रदेशाध्यक्ष आमदार रवींद्र चव्हाण यांनी आज रत्नागिरी येथील पक्ष कार्यकर्त्यांच्या बैठकीत दिले. रत्नागिरी जिल्हा दौऱ्यावर असताना चव्हाण यांनी केलेल्या या विधानामुळे बाळ माने यांच्या भाजप प्रवेशाच्या चर्चांना आता पूर्णविराम मिळाला आहे.
विधान परिषद निवडणुकीतील ‘त्या’ घडामोडींची पार्श्वभूमी
या संपूर्ण प्रकरणाची पाळेमुळे नुकत्याच झालेल्या विधान परिषद निवडणुकीशी जोडलेली आहेत. या निवडणुकीत बाळ माने यांनी उद्धव बाळासाहेब ठाकरे (उबाठा) पक्षाकडून उमेदवारी अर्ज दाखल केला होता. मात्र, अर्ज मागे घेण्याच्या अंतिम दिवशी माने यांनी अचानक सिंधुदुर्गचे पालकमंत्री नितेश राणे यांच्या उपस्थितीत रत्नागिरी जिल्हाधिकारी कार्यालयात जाऊन आपला उमेदवारी अर्ज मागे घेतला. या धक्कादायक राजकीय घडामोडीनंतर उबाठा पक्षाकडून बाळ माने यांची पक्षातून हकालपट्टी करण्यात आली होती.
नितेश राणेंची उपस्थिती आणि मुंबई दौरा ठरला निष्फळ
जिल्हाधिकारी कार्यालयात बाळ माने यांचा अर्ज मागे घेताना भाजप नेते नितेश राणे सोबत असल्याने माने हे भाजपमध्ये प्रवेश करणार, अशा शक्यता राजकीय वर्तुळात वर्तवल्या जात होत्या. खुद्द माने यांच्याकडूनही या संकेतांना दुजोरा देण्यात आला होता. याच पार्श्वभूमीवर पुढील प्रक्रियेसाठी बाळ माने तातडीने मुंबईला रवाना झाले होते. परंतु, दीर्घ कालावधी उलटूनही त्यांचा अधिकृत भाजप प्रवेश होऊ शकला नव्हता आणि आज प्रदेशाध्यक्षांच्या विधानाने त्यावर शिक्कामोर्तब केले.
‘अशा’ लोकांना पक्षात स्थान नाही: रवींद्र चव्हाण
रत्नागिरीतील कार्यकर्त्यांना संबोधित करताना प्रदेशाध्यक्ष रवींद्र चव्हाण यांनी पक्षाची भूमिका अत्यंत कडक शब्दात मांडली. चव्हाण म्हणाले, “भारतीय जनता पार्टीचा विचार १०० टक्के हातात घेऊन, भाजपचा झेंडा कधीही खाली न ठेवणाऱ्या कार्यकर्त्यांच्या बळावर आपल्याला पक्ष पुढे न्यायचा आहे. २०२४ च्या निवडणुकीत मिळालेल्या थोड्याशा अपयशामुळे काही लोकांना असे वाटू लागले की महाविकास आघाडीचे चांगले दिवस आले आहेत. या विचारातून ज्यांनी आपल्या पक्षाला आणि विचारधारेला बाजूला ठेवून महाविकास आघाडीचे पारडे धरले, अशा लोकांना मी भारतीय जनता पार्टीचा प्रदेशाध्यक्ष असेपर्यंत तरी पक्षात स्थान नाही.”
कोकणच्या राजकीय समीकरणांवर होणार परिणाम
रवींद्र चव्हाण यांच्या या भूमिकेमुळे रत्नागिरी आणि पर्यायाने कोकणच्या राजकीय वर्तुळात नव्या समीकरणांची चर्चा सुरू झाली आहे. पक्षाशी एकनिष्ठ राहणाऱ्या कार्यकर्त्यांना बळ देण्याचा संदेश यातून नेतृत्वाने दिला आहे. दुसरीकडे, उबाठा पक्षातून हकालपट्टी झालेले आणि आता भाजपकडूनही नकार मिळालेले माजी आमदार बाळ माने आगामी काळात कोणती राजकीय पावले उचलतात, याकडे स्थानिक पातळीवर लक्ष लागले आहे.
