बंडखोर खासदारांवर अपात्रतेची टांगती तलवार; स्पष्टीकरणासाठी ठराविक वेळेची मुदत
नवी दिल्ली / मुंबई: Operation Tiger Whip Notice म्हणजेच महाराष्ट्राच्या राजकारणात ‘ऑपरेशन टायगर’मुळे उडालेल्या प्रचंड राजकीय वादळाच्या पार्श्वभूमीवर शिवसेना उद्धव बाळासाहेब ठाकरे पक्षाने अत्यंत आक्रमक पाऊल उचलले आहे. नवी दिल्लीतील जुन्या संसद भवनात बोलावण्यात आलेल्या संसदीय दलाच्या तातडीच्या बैठकीला गैरहजर राहिलेल्या ६ लोकसभा खासदारांना पक्षाकडून अधिकृतपणे ‘कारणे दाखवा नोटीस’ बजावण्यात आली आहे. पक्षाचा कडक ‘थ्री-लाइन व्हिप’ जारी करूनही बैठक टाळणाऱ्या या सर्व खासदारांवर आता खासदारकी गमावण्याची अर्थात अपात्रतेची टांगती तलवार निर्माण झाली आहे.
व्हिप धुडकावणे पडणार महागात; केवळ ३ खासदार राहिले उपस्थित
शिवसेना (UBT) पक्षाने आपल्या सर्व ९ लोकसभा खासदारांना दिल्लीतील महत्त्वपूर्ण बैठकीला वैयक्तिकरित्या हजर राहण्यासाठी कडक ‘थ्री-लाइन व्हिप’ जारी केला होता. मात्र, या बैठकीला शिवसेना नेते संजय राऊत यांच्यासह केवळ अनिल देसाई, अरविंद सावंत आणि राजाभाऊ वाजे हे ३ च खासदार उपस्थित राहिले. उर्वरित ६ खासदारांनी या महत्त्वपूर्ण बैठकीकडे साफ पाठ फिरवली. या गंभीर शिस्तभंगाची दखल घेत, मुख्य प्रतोद (Chief Whip) अनिल देसाई यांच्या स्वाक्षरीने या ६ अनुपस्थित खासदारांना नोटीस पाठवण्यात आली आहे.
नोटीसमधील मुख्य मुद्दा: “पक्षप्रमुखांच्या आदेशानुसार जारी करण्यात आलेल्या अधिकृत ‘थ्री-लाइन व्हिप’चे उल्लंघन का केले? आणि तुमच्यावर पक्षांतरबंदी कायद्यानुसार (Anti-Defection Law) अपात्रतेची कारवाई का करू नये?”, याचे लेखी स्पष्टीकरण देण्यासाठी या खासदारांना ठराविक वेळेची मुदत देण्यात आली आहे.
‘या’ ६ खासदारांना बजावण्यात आली अधिकृत नोटीस:
१. संजय जाधव (परभणी) २. संजय देशमुख (यवतमाळ-वाशिम) ३. नागेश पाटील आष्टीकर (हिंगोली) ४. ओमराजे निंबाळकर (धाराशिव) ५. भाऊसाहेब वाकचौरे (शिर्डी) ६. संजय दिना पाटील (मुंबई उत्तर-पूर्व)
कायदेशीर लढाई सुरू; लोकसभा अध्यक्षांकडे धाव घेण्याची तयारी
ठाकरे गटाचे लोकसभेतील गटनेते अरविंद सावंत यांनी या घडामोडींवर स्पष्ट भूमिका मांडली आहे. पक्षाचा मुख्य खटला आधीच सर्वोच्च न्यायालयात प्रलंबित असल्याचे त्यांनी सांगितले. आता संसदीय बैठकीत व्हिपचे उल्लंघन झाल्याचे अधिकृत कायदेशीर पुरावे गोळा करून शिवसेना थेट लोकसभा अध्यक्ष ओम बिर्ला यांच्याकडे या सहाही खासदारांना अपात्र ठरवण्यासाठी याचिका दाखल करण्याच्या तयारीत आहे.
२/३ संख्याबळाअभावी बंडखोर खासदार अडचणीत?
दुसरीकडे, राजकीय वर्तुळातून मिळालेल्या माहितीनुसार, बंडखोर खासदारांनी स्वतंत्र गटाच्या मान्यतेसाठी लोकसभा अध्यक्षांना दिलेल्या पत्रात आवश्यक असणारे 2/3 (म्हणजेच ९ पैकी किमान ६ ते ७ खासदार) संख्याबळ नसल्याचा दावा ठाकरे गटाकडून केला जात आहे. आवश्यक कायदेशीर संख्याबळ नसल्यास ‘ऑपरेशन टायगर’ तांत्रिक आणि कायदेशीरदृष्ट्या आधीच अडचणीत आले आहे. आता या नोटिसीला बंडखोर खासदार काय उत्तर देतात आणि लोकसभा अध्यक्ष यावर काय भूमिका घेतात, यावरच या खासदारांचे राजकीय भविष्य अवलंबून असणार आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:13 18-06-2026
