मुख्य रस्त्यावर बैलांच्या आपसातील झुंजींमुळे नागरिक त्रस्त; शाळा सुरू झाल्याने विद्यार्थ्यांच्या सुरक्षेसाठी कोंडवाड्याची मागणी
दापोली: ‘Dapoli ST Stand News’ | दापोली एसटी स्टँडच्या मागील परिसरामध्ये मोकाट आणि कमालीच्या आक्रमक बैलांनी धुमाकूळ घातला आहे. या बैलांच्या वाढत्या वावरामुळे स्थानिक नागरिक, प्रवासी आणि विशेषतः लहान शाळकरी विद्यार्थ्यांमध्ये तीव्र भीतीचे वातावरण निर्माण झाले आहे. परिसरात ‘रघ्या’ आणि ‘टग्या’ या नावांनी ओळखले जाणारे दोन मोकाट बैल मुख्य रस्त्यावर सतत फिरत असतात. हे बैल अनेकदा भररस्त्यात आपसांत भयंकर झुंज देत असल्याने या मार्गावरून जाणाऱ्या वाहनांच्या आणि पादचाऱ्यांच्या अपघाताचा धोका कमालीचा वाढला आहे.
शाळा सुरू झाल्याने पालकांमध्ये चिंता; सुरक्षेचा प्रश्न ऐरणीवर
सध्या नवीन शैक्षणिक वर्ष सुरू झाल्याने सकाळी आणि संध्याकाळी या परिसरातून विद्यार्थ्यांची मोठी वर्दळ असते. मात्र, एसटी स्टँडच्या मागील गजबजलेल्या भागात या आक्रमक मोकाट गुरांच्या वाढत्या दहशतीमुळे विद्यार्थ्यांच्या सुरक्षेचा प्रश्न आता ऐरणीवर आला आहे. हे बैल अचानक बिथरल्यास किंवा त्यांच्यात झुंज सुरू झाल्यास लहान मुलांना गंभीर दुखापत होण्याची दाट शक्यता निर्माण झाली आहे. त्यामुळे आपल्या मुलांच्या सुरक्षेबाबत पालक वर्ग सध्या कमालीचा चिंताग्रस्त बनला आहे.
मोकाट गुरांचा बंदोबस्त करून गोशाळा किंवा कोंडवाड्यामध्ये हलवण्याची मागणी
या वाढत्या त्रासाला कंटाळून दापोलीतील स्थानिक रहिवासी, व्यापारी आणि पालकांनी नगरपंचायत प्रशासनाकडे तातडीने कडक पावले उचलण्याची मागणी केली आहे. मुख्य रस्त्यावर दहशत निर्माण करणाऱ्या या ‘रघ्या’ आणि ‘टग्या’ बैलांसह शहरातील इतर सर्व मोकाट गुरांचा तातडीने बंदोबस्त करण्यात यावा, अशी मागणी निवेदनाद्वारे करण्यात आली आहे. या सर्व मोकाट जनावरांना पकडून त्यांची रवानगी तातडीने एखाद्या गोशाळेत किंवा कोंडवाड्यामध्ये करण्यात यावी, जेणेकरून भविष्यातील मोठा अपघात टाळता येईल, अशी आग्रही भूमिका स्थानिकांनी घेतली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:05 23-06-2026
