राजापूर: ‘Rajapur Railway Station Lift’ संदर्भातील कोकण रेल्वे प्रवाशांची अनेक वर्षांची प्रतीक्षा आता संपली आहे. कोकण रेल्वे मार्गावरील राजापूर तालुक्यातील एकमेव महत्त्वाचे स्थानक असलेल्या राजापूर रोड रेल्वे स्थानकात मंजूर झालेल्या अत्याधुनिक लिफ्टच्या उभारणीच्या कामाला अखेर प्रत्यक्षात सुरुवात झाली आहे. भौगोलिक रचनेमुळे काहीशा खोलगट भागात वसलेल्या या स्थानकावर प्रवाशांना दररोज चढ-उतार करताना, तसेच जड सामानासह ये-जा करताना मोठ्या अडचणींचा सामना करावा लागत होता. आता लिफ्टचे प्रत्यक्ष बांधकाम सुरू झाल्यामुळे राजापूर परिसरातील प्रवाशांमध्ये समाधानाचे वातावरण निर्माण झाले आहे.
६० लाखांचा निधी मंजूर; निविदा प्रक्रियेनंतर प्रत्यक्ष कामाला सुरुवात
राजापूर रोड रेल्वे स्थानकाच्या विशिष्ट भौगोलिक रचनेमुळे ज्येष्ठ नागरिक, महिला, दिव्यांग तसेच आजारी प्रवाशांना जिन्यांवरून सामानासह ये-जा करणे प्रचंड त्रासाचे ठरत होते. यासाठी स्थानकात लिफ्टची सुविधा उपलब्ध करून देण्याची मागणी अनेक वर्षांपासून सातत्याने केली जात होती. या मागणीसाठी ‘पंचक्रोशी ग्रामविकास समिती’ने सातत्यपूर्ण पाठपुरावा केला. समितीचे प्रशासकीय प्रमुख आदिनाथ कपाळे यांनी कोकण रेल्वे प्रशासनाशी वारंवार पत्रव्यवहार करून हा प्रश्न मार्गी लावण्यासाठी विशेष प्रयत्न केले. त्यांच्या या प्रयत्नांना यश येत रेल्वे प्रशासनाकडून सुमारे ६० लाख रुपयांच्या निधीतून लिफ्टसाठी मंजुरी मिळाली. निविदा प्रक्रिया पूर्ण झाल्यानंतर प्रत्यक्ष काम सुरू होण्यास काहीसा विलंब झाला असला, तरी आता रेल्वे प्रशासनाने प्रत्यक्ष कामाला गती दिली आहे.
अनेक महत्त्वाच्या गाड्यांना थांबा असल्याने प्रवाशांची वाढती वर्दळ
राजापूर रोड रेल्वे स्थानकावर कोकणकन्या एक्सप्रेस, तुतारी, मांडवी, नेत्रावती, दिवा-सावंतवाडी पॅसेंजर एक्सप्रेस तसेच उधना आणि मडगाव-नागपूर यांसारख्या अनेक महत्त्वाच्या आणि लांब पल्ल्याच्या गाड्यांना अधिकृत थांबा देण्यात आला आहे. यामुळे या स्थानकावर दररोज मोठ्या प्रमाणावर प्रवाशांची वर्दळ कायम असते. रेल्वे प्रशासनाकडून लवकरच हे लिफ्टचे काम पूर्ण करून प्रवाशांसाठी ही आधुनिक सुविधा खुली केली जाणार आहे. ही लिफ्ट कार्यान्वित झाल्यानंतर प्रवाशांचा रेल्वे प्रवास अधिक सुरक्षित, सुलभ आणि सुखकर होण्यास मोठी मदत होणार आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:05 23-06-2026
