चिपळूण: Chiplun woman death | उंदीर मारण्याचे विषारी औषध प्राशन केलेल्या ३४ वर्षीय विवाहित महिलेचा मुंबईतील रुग्णालयात उपचारादरम्यान मृत्यू झाला आहे. रत्नागिरी जिल्ह्यातील चिपळूण पोलीस ठाण्याच्या हद्दीत ही घटना घडली असून, याप्रकरणी पोलिसांनी आकस्मिक मृत्यूची अधिकृत नोंद केली आहे. गेल्या काही दिवसांपासून या महिलेची मुंबईत मृत्यूशी सुरू असलेली झुंज अखेर अपयशी ठरली.
मुरादपूर येथील घटना; उलट्या व जुलाबाचा त्रास
पोलीस सूत्रांकडून मिळालेल्या सविस्तर माहितीनुसार, अक्षता सुमित दुर्गुळे (वय ३४, रा. अमेया पार्क, सायली बिल्डिंग ‘बी’ विंग, फ्लॉट क्र. २०२, मुरादपूर, गणेश मंदिराजवळ, चिपळूण) असे मृत महिलेचे नाव आहे. अक्षता यांनी मंगळवार, २६ मे रोजी रात्री ११:३० वाजण्याच्या सुमारास राहत्या घरी उंदीर मारण्यासाठी वापरण्यात येणारे विषारी औषध प्राशन केले होते. औषध पोटात गेल्याने काही वेळातच त्यांना तीव्र उलट्या आणि जुलाबाचा त्रास सुरू झाला.
चिपळूण ते मुंबई; वाचवण्यासाठी पतीची धडपड
अक्षता यांची प्रकृती बिघडल्याचे लक्षात येताच त्यांचे पती सुमित दुर्गुळे यांनी बुधवार, २७ मे रोजी पहाटे ६:०० वाजता त्यांना तातडीने चिपळुणातील एका खासगी रुग्णालयात उपचारासाठी दाखल केले. मात्र, विष अंगात पसरल्याने त्यांची प्रकृती अधिकच गंभीर बनली. त्यामुळे २८ मे रोजी पुढील उपचारासाठी त्यांना दुसऱ्या रुग्णालयात हलवण्यात आले. तेथील डॉक्टरांनी परिस्थितीचे गांभीर्य ओळखून त्यांना तातडीने मुंबई येथील केईएम हॉस्पिटल (KEM Hospital) मध्ये नेण्याचा सल्ला दिला. त्यानुसार २९ मे रोजी सकाळी १०:२६ वाजता अक्षता यांना मुंबईच्या केईएम रुग्णालयात दाखल करण्यात आले.
आठ दिवसांच्या उपचारांनंतर प्राणज्योत मालवली
मुंबईतील केईएम रुग्णालयातील डॉक्टरांच्या पथकाने अक्षता यांच्यावर अतिदक्षता विभागात तातडीने उपचार सुरू केले. मात्र, आठ दिवस मृत्यूशी झुंज दिल्यानंतर अखेर बुधवार, ३ जून रोजी सकाळी ६:३० वाजता डॉक्टरांनी त्यांना मृत घोषित केले. या घटनेमुळे दुर्गुळे परिवारासह चिपळूण मुरादपूर परिसरात शोककळा पसरली आहे.
याप्रकरणी चिपळूण पोलीस ठाण्यात आकस्मिक मृत्यू क्रमांक ३५/२०२६ अन्वये गुन्हा नोंदवण्यात आला आहे. या घटनेचा पुढील अधिक तपास चिपळूण पोलिसांकडून करण्यात येत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:44 24-06-2026
