नागपूर: शिवसेना (उद्धव बाळासाहेब ठाकरे) पक्षाचे पक्षप्रमुख उद्धव ठाकरे यांचे आज नागपूरच्या डॉ. बाबासाहेब आंबेडकर आंतरराष्ट्रीय विमानतळावर आगमन झाले. पक्षातील अलीकडील मोठी बंडखोरी आणि ‘ऑपरेशन टायगर’ अंतर्गत विदर्भातील खासदारांनी घेतलेल्या बदलत्या राजकीय भूमिकेनंतर उद्धव ठाकरे (Uddhav Thackeray Nagpur) यांनी थेट मैदानात उतरून कार्यकर्त्यांशी संवाद साधण्यासाठी हा महत्त्वाचा राज्यव्यापी दौरा सुरू केला आहे. या दौऱ्याची अधिकृत सुरुवात त्यांनी विदर्भाच्या भूमीतून केली असून, नागपूर विमानतळावर उपस्थित हजारो शिवसैनिकांनी पारंपरिक वाद्यांच्या गजरात त्यांचे अत्यंत जंगी स्वागत केले.
“शिवसेना कुणीही संपवू शकणार नाही”
विमानतळाबाहेर उपस्थित कार्यकर्त्यांशी अत्यंत आक्रमक आणि भावनिक संवाद साधताना उद्धव ठाकरे यांनी शिवसैनिकांना आत्मविश्वासाचा मोठा कानमंत्र दिला. ते म्हणाले, “आपला आत्मविश्वास असाच कायम ठेवा. कुणाच्या कितीही पिढ्या मैदानात उतरल्या, तरी त्या शिवसेना संपवू शकत नाहीत. तुमच्यासारख्या प्रामाणिक कार्यकर्त्यांमुळेच शिवसेना टिकून आहे आणि पुढेही राहील. जे जे आज शिवसेनेच्या मुळावर उठले आहेत, त्यांना राजकीयदृष्ट्या संपवल्याशिवाय तुम्ही थांबणार नाही, हा मला पूर्ण विश्वास आहे.”
सरकारला थेट आव्हान; पुढील महिन्यात नागपुरात भव्य मेळावा
यवतमाळच्या दिशेने रवाना होण्यापूर्वी उद्धव ठाकरे यांनी नागपूरच्या कार्यकर्त्यांना रिचार्ज करत पुढील महिन्यात येथे एका मोठ्या मेळाव्याची तयारी करण्याचे आदेश दिले. “मी आज यवतमाळला जात असलो, तरी तुम्हाला शब्द देतो की, पुन्हा नागपुरात आल्याशिवाय राहणार नाही. नागपुरात आल्यावर आपण शिवसैनिकांचा एक भव्य मेळावा घेऊ,” असे त्यांनी जाहीर केले. यावेळी नागपुरातील मैदानांच्या स्थितीवरून त्यांनी विद्यमान सरकारवर उपरोधिक शब्दांत टीका केली. “काही वर्षांपूर्वी आपण कस्तुरचंद पार्कमध्ये ऐतिहासिक सभा घेतली होती, तेव्हा तिथली गर्दी ओसंडून वाहत होती. आता जर सरकारने नागपुरात तेवढे मोठे मैदान शिल्लक ठेवले असेल, तर मी नक्कीच त्या मैदानात येऊन जाहीर सभा घेणार,” असे आव्हान त्यांनी दिले.
फुटीर खासदारांच्या बालेकिल्ल्यात मनोधैर्य वाढवणार
या झंझावाती दौऱ्याचा मुख्य उद्देश पक्षातील बंडखोरीनंतर तळागाळातील कार्यकर्त्यांचे मनोधैर्य उंचावणे हा आहे. यवतमाळ-वाशिमचे खासदार संजय देशमुख यांनी नुकताच शिंदे गटात प्रवेश केल्यामुळे, त्या मतदारसंघातील निष्ठावंत कार्यकर्त्यांना बळ देण्यासाठी उद्धव ठाकरे आज यवतमाळला भेट देत आहेत. यवतमाळमधील पदाधिकारी आणि कार्यकर्त्यांच्या गाठीभेटी घेतल्यानंतर, आगामी दिवसांत त्यांचा हा दौरा हिंगोलीसह मराठवाडा आणि उर्वरित विदर्भातील विविध भागांमध्ये धडकणार आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:15 27-06-2026
