रत्नागिरी:
Ratnagiri Mavlange Woman Death | रत्नागिरी तालुक्यातील मावळंगे-बोळेवाडी येथील एका ६० वर्षीय वृद्ध महिलेचा राहत्या घरी बाथरूममध्ये पाय घसरून पडल्याने उपचार सुरू असताना दुर्दैवी मृत्यू झाला आहे. या धक्कादायक घटनेची नोंद पूर्णगड पोलीस ठाण्यात करण्यात आली असून पोलीस पुढील कायदेशीर तपास करत आहेत.
वर्षभरापासून आजारी होत्या प्रतिमला गोठणेकर
पोलिसांनी दिलेल्या अधिकृत माहितीनुसार, प्रतिमला प्रकाश गोठणेकर (वय ६०, रा. मावळंगे, बोळेवाडी, ता. जि. रत्नागिरी) असे मृत वृद्धेचे नाव आहे. प्रतिमला या गेल्या सुमारे वर्षभरापासून आजारी होत्या, अशी माहिती प्राथमिक तपासात समोर आली आहे.
घरी असतानाच घडली दुर्दैवी घटना
२५ जून रोजी सकाळी ८ वाजण्याच्या सुमारास प्रतिमला यांचा मुलगा रत्नदीप प्रकाश गोठणेकर हा घरी हजर होता. याच दरम्यान प्रतिमला या नेहमीप्रमाणे बाथरूमला गेल्या असताना अचानक त्यांचा पाय घसरला व त्या खाली पडल्या. त्या पडल्याचे आणि त्यांना गंभीर दुखापत झाल्याचे कुटुंबीयांच्या लक्षात येताच त्यांनी तातडीने हालचाली केल्या.
जिल्हा शासकीय रुग्णालयात उपचार सुरू असताना प्राणज्योत मालवली
कुटुंबीयांनी प्रतिमला यांना गंभीर जखमी अवस्थेत तातडीने उपचारासाठी रत्नागिरी येथील जिल्हा शासकीय रुग्णालयात दाखल केले. तिथे त्यांच्यावर वैद्यकीय अधिकाऱ्यांच्या देखरेखीखाली उपचार सुरू होते. मात्र, त्यांची प्राणजोत वाचवण्यात यश आले नाही. उपचार सुरू असतानाच दुसऱ्या दिवशी म्हणजे २६ जून रोजी पहाटे १.०८ वाजता वैद्यकीय अधिकाऱ्यांनी त्यांना मृत घोषित केले.
पूर्णगड पोलीस ठाण्यात गुन्हा दाखल
या संपूर्ण प्रकरणाची माहिती मिळताच पूर्णगड पोलिसांनी रुग्णालयात धाव घेतली. या दुर्दैवी मृत्यूप्रकरणी पूर्णगड पोलीस ठाण्यात सध्या आकस्मिक मृत्यू म्हणून रीतसर नोंद करण्यात आली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
17:27 01-07-2026
