ठाकरेंकडून ऐनवेळी अर्ज मागे; सचिन अहिर यांची बिनविरोध नियुक्ती
मुंबई:
महाराष्ट्र विधान परिषदेच्या उपसभापती (Vidhan Parishad Deputy Chairman) पदासाठी झालेल्या निवडणुकीत महायुतीचे उमेदवार आणि शिवसेना शिंदे गटाचे आमदार सचिन अहिर यांची एकमताने निवड करण्यात आली आहे. विरोधी पक्ष महाविकास आघाडीने ऐनवेळी आपल्या उमेदवाराचा अर्ज मागे घेतल्याने ही निवडणूक बिनविरोध पार पडली. या महत्त्वपूर्ण राजकीय प्रक्रियेवेळी सभागृहात मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्यासह दोन्ही बाजूंचे लोकप्रतिनिधी उपस्थित होते.
महाविकास आघाडीकडून जगन्नाथ अभ्यंकर यांचा अर्ज मागे
विधान परिषदेतील संख्याबळ पाहता महायुतीचे पारडे जड होते आणि हा विजय एकतर्फी होणार हे स्पष्ट होते. महायुतीकडून सचिन अहिर तर महाविकास आघाडीकडून शिवसेना ठाकरे गटाचे जगन्नाथ अभ्यंकर रिंगणात होते. मात्र, संसदीय संकेत आणि सभागृहाची परंपरा जपत भाजप नेते व मंत्री चंद्रकांत पाटील यांनी विरोधकांना उमेदवारी अर्ज मागे घेण्याची विनंती केली. या आवाहनाला प्रतिसाद देत, ठाकरे गटाचे आमदार अनिल परब यांनी सभागृहाच्या सर्वानुमते निवडीच्या इच्छेचा मान ठेवत अर्ज मागे घेत असल्याची घोषणा केली. त्यानंतर आवाजी मतदानाने सचिन अहिर यांची निवड झाली.
सचिन अहिर निर्भीडपणे काम करणारे नेतृत्व: मुख्यमंत्री देवेंद्र फडणवीस
नवनियुक्त उपसभापतींचे अभिनंदन करताना मुख्यमंत्री देवेंद्र फडणवीस यांनी त्यांच्या राजकीय प्रवासाला उजाळा दिला. “१९९९ मध्ये मी आणि सचिन अहिर एकत्र आमदार म्हणून निवडून आलो होतो. ‘अहिर’ या शब्दाचा अर्थ गोपालक आणि निर्भीड असा आहे आणि ते अत्यंत निडरपणे काम करणारे व्यक्ती आहेत,” अशा शब्दांत मुख्यमंत्र्यांनी त्यांचे कौतुक केले. मिल मजदूर संघापासून राजकीय कारकीर्द सुरू करणारे सचिन अहिर हे चळवळीतील कार्यकर्ते असून, गृहनिर्माण राज्यमंत्री म्हणूनही त्यांनी उत्तम काम केले आहे. उपसभापती पदाच्या आसनावरून ते सर्वांना समान न्याय देतील, असा विश्वास मुख्यमंत्र्यांनी व्यक्त केला. तसेच माजी उपसभापती नीलम गोऱ्हे यांच्याही कामगिरीचा त्यांनी विशेष गौरव केला.
मैदान गाजवायला ‘सचिन’ सज्ज: उपमुख्यमंत्री एकनाथ शिंदे
उपमुख्यमंत्री एकनाथ शिंदे यांनी क्रिकेटचे रूपक वापरत सचिन अहिर यांचे कौतुक केले. “आपल्या नावातच ‘सचिन’ असल्याने त्यांना योग्य वेळी योग्य निर्णय घेता येतो. एक सचिन क्रिकेटचे मैदान गाजवून निवृत्त झाला, तर हा दुसरा सचिन आता उपसभापती पदाच्या आसनावर नवीन इनिंग खेळायला आणि मैदान गाजवायला सज्ज झाला आहे,” असे शिंदे म्हणाले. सचिन अहिर यांच्यातील समाजकारणी आणि कामगारांशी असलेली त्यांची नाळ सभागृहाच्या कामकाजाला अधिक उंचीवर नेईल, असा विश्वास त्यांनी व्यक्त केला.
सचिन अहिर यांचा राजकीय प्रवास आणि विधान परिषदेचे संख्याबळ
सचिन अहिर यांनी ३० जून रोजी ठाकरे गटातून शिवसेना शिंदे गटात प्रवेश केला होता आणि लगेचच उपसभापती पदासाठी अर्ज भरला होता. वरळी मतदारसंघातून तीन वेळा विधानसभेवर निवडून आलेले अहिर २०१४ च्या महायुती सरकारमध्ये राज्यमंत्री होते. २०२० मध्ये त्यांची शिवसेनेच्या उपनेतेपदी तर २०२२ मध्ये विधान परिषदेवर नियुक्ती झाली होती.
सध्याचे विधान परिषदेतील पक्षीय बलाबल:
- भाजप: ३५
- शिवसेना (शिंदे गट): १३
- राष्ट्रवादी (अजित पवार गट): १०
- शिवसेना (ठाकरे गट): ०५
- काँग्रेस: ०५
- राष्ट्रवादी (शरद पवार गट): ०२
- अपक्ष: ०३
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:03 02-07-2026
