ब्रेक फेल झाल्याने दोन्ही गाड्यांमध्ये झाली जोरदार धडक; जखमींवर जिल्हा रुग्णालयात उपचार सुरू
रत्नागिरी:
रत्नागिरी तालुक्यातील शीळ येथे गुरुवारी सकाळी दोन एसटी बसमध्ये भीषण अपघात (Ratnagiri Bus Accident) झाल्याची घटना घडली आहे. सकाळी साडेसहा ते सात वाजण्याच्या सुमारास हा अपघात झाला. एका बसचे ब्रेक अचानक निकामी झाल्यामुळे हा अपघात घडल्याची प्राथमिक माहिती समोर येत आहे. अपघाताची माहिती मिळताच स्थानिक नागरिक आणि पोलिसांनी तातडीने घटनास्थळी धाव घेत बचावकार्य सुरू केले.
दांडेआडम आणि भावेआडम बसमध्ये समोरासमोर धडक
मिळालेल्या माहितीनुसार, दांडेआडम येथून रत्नागिरीच्या दिशेने प्रवासी घेऊन येणारी बस क्रमांक MH 14 BT 2231 आणि रत्नागिरी आगारातून भावेआडमच्या दिशेने जाणारी बस क्रमांक MH 14 BT 4459 यांच्यात शीळ येथे ही जोरदार धडक झाली. दोन्ही बस समोरासमोर आदळल्याने गाड्यांच्या समोरील भागाचे मोठे नुकसान झाले आहे. एका बसचे ब्रेक निकामी झाल्याने चालकाचे वाहनावरील नियंत्रण सुटले आणि ही दुर्घटना घडली.
शाळकरी विद्यार्थ्यांची मोठी उपस्थिती; ११ जण जखमी
दांडेआडमवरून येणाऱ्या बसमध्ये सकाळी शाळेत जाणाऱ्या विद्यार्थ्यांची संख्या मोठी होती. या भीषण अपघातात ११ शाळकरी विद्यार्थी आणि एक बस चालक जखमी झाले आहेत. सर्व जखमींना तात्काळ उपचारासाठी रत्नागिरी येथील जिल्हा शासकीय रुग्णालयात दाखल करण्यात आले आहे. सुदैवाने, कोणत्याही विद्यार्थ्याला गंभीर दुखापत झालेली नाही, अशी माहिती पोलिसांनी दिली आहे. काही किरकोळ जखमी विद्यार्थ्यांची प्राथमिक तपासणी करून त्यांना घरी सोडण्यात आले आहे.
विद्यार्थ्यांच्या तोंडाला दुखापत; पोलिसांकडून तपास सुरू
अपघाताच्या धडकेमुळे बसमधील काही विद्यार्थ्यांच्या दाताला आणि हनुवटीला किरकोळ दुखापत झाली आहे. घटनास्थळी पोहोचलेल्या प्रशासकीय अधिकाऱ्यांनी आणि पोलिसांनी जखमींची विचारपूस केली असून रुग्णालयात आवश्यक त्या वैद्यकीय सुविधा पुरवण्यात आल्या आहेत. या अपघाताचे नेमके तांत्रिक कारण काय होते आणि दोन्ही गाड्यांच्या वेगाबाबतची वस्तुस्थिती जाणून घेण्यासाठी गुहागर आणि रत्नागिरी पोलीस पुढील कायदेशीर तपास करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:17 02-07-2026
